حکومت کا 200 یونٹ تک بجلی پر سبسڈی ختم کرنیکا فیصلہ
حکومت پاکستان نے بین الاقوامی مالیاتی فنڈ کے ساتھ بجلی سبسڈی کے موجودہ نظام میں بڑی تبدیلی پر اتفاق کرتے ہوئے آئندہ چند ماہ میں نیا طریقہ کار متعارف کرانے کی یقین دہانی کرا دی۔ ذرائع کے مطابق نئے نظام کے تحت 200 یونٹس تک بجلی استعمال کرنے والے تمام صارفین کو یکساں سبسڈی دینے کا سلسلہ ختم کر دیا جائے گا جبکہ جنوری 2027 سے صرف مستحق خاندانوں کو ہدفی بنیادوں پر رعایت فراہم کی جائے گی۔
یہ بھی پڑھیں: بینظیر سپورٹ پروگرام: نئی مالی قسط کی ادائیگی کا آغاز
حکام کا کہنا ہے کہ نئی سکیم بینظیر انکم سپورٹ پروگرام کے ڈیٹا اور نیشنل سوشیو اکنامک رجسٹری سے منسلک ہوگی تاکہ اصل حق دار صارفین کی نشان دہی کی جا سکے۔ موجودہ نظام میں بعض گھرانے ایک سے زائد بجلی میٹر استعمال کر کے ہر میٹر کی کھپت 200 یونٹس سے کم رکھتے ہیں تاکہ زیادہ سبسڈی حاصل کی جاسکے تاہم مجوزہ نظام کے بعد ایسی گنجائش محدود ہو جائے گی۔
حکومت اس مقصد کیلئے عالمی بینک کے تعاون سے نیا ڈیجیٹل میکنزم تیار کر رہی ہے جبکہ سبسڈی کی ادائیگی کے لیے بیرونی فرم کی خدمات لینے پر بھی غور کیا جا رہا ہے۔
دوسری جانب حکومت پنجاب میں نافذ ای آبیانہ نظام کو دیگر صوبوں تک پڑھانے کی تیاری بھی جاری ہے جبکہ آبپاشی کے نرخوں میں اصلاحات پر کام کیا جارہا ہے تاکہ اخراجات اور وسائل میں توازن برقرار رکھا جا سکے۔
اعلی احکام کے مطابق پاکستان ریزیلینس اینڈ سسٹین ایبلٹی فیسلٹی کے تحت 20 کروڑ ڈالر کی دوسری قسط کے حصول کے لیے آئی ایم ایف کا ایگزیکٹو بورڈ 8 مئی کو واشنگٹن میں اجلاس کرے گا جہاں پاکستان سے متعلق اہم فیصلے متوقع ہیں۔
