شادی کی خواہش کیلئے خاوند نے بیوی اور بیٹی کو قتل کروادیا

پولیس کے مطابق مقتولہ خاتون کا شوہر غلام مصطفیٰ اور اس کا پڑوسی یاسر اس دوہرے قتل میں ملوث پائے گئے ہیں۔ ابتدائی تحقیقات کے مطابق ملزم غلام مصطفیٰ دوسری شادی کرنا چاہتا تھا اور اسی مقصد کے تحت اس نے اپنی بیوی کے قتل کی منصوبہ بندی کی۔

پولیس کا کہنا ہے کہ ملزم نے پڑوسی یاسر کو بیوی کے قتل کی سپاری دی، جس کے عوض ڈیڑھ لاکھ روپے میں معاملہ طے پایا۔ ایڈوانس کے طور پر سونے کے ٹاپس بھی دیے گئے۔

واقعہ گزشتہ روز پیش آیا جب ملزم یاسر گھر میں داخل ہوا اور دوسری منزل پر جا کر تیز دھار آلے سے خاتون کو قتل کر دیا۔ اس دوران تین سالہ معصوم بچی شور سن کر سیڑھیوں کے ذریعے اوپر آئی تو ملزم نے اسے بھی بے دردی سے قتل کر دیا۔

یہ بھی پڑھیں:25 کلوواٹ سے کم سولر صارفین کیلئے لائسنس کی شرط ختم

پولیس کے مطابق ملزم غلام مصطفیٰ نے واردات کو چھپانے کے لیے اسے ڈکیتی کا رنگ دینے کی کوشش کی، تاہم مشکوک حالات کے پیش نظر پولیس نے فوری کارروائی کرتے ہوئے مقتولہ کے شوہر کو اسی روز گرفتار کر لیا۔

پولیس کا کہنا ہے کہ مزید تفتیش جاری ہے اور دیگر پہلوؤں کا بھی جائزہ لیا جا رہا ہے۔