چار اہم اسلامی ممالک کے وزرائے خارجہ آج اسلام آباد میں ایک اہم اجلاس میں شرکت کریں گے، جس میں خطے کی کشیدہ صورتحال پر تفصیلی غور کیا جائے گا۔
رپورٹس کے مطابق مصر کے وزیر خارجہ ڈاکٹر بدر عبدالعاطی نائب وزیراعظم اور وزیر خارجہ سینیٹر اسحاق ڈار کی دعوت پر دو روزہ دورے پر اسلام آباد پہنچے۔
ایئرپورٹ پر ایڈیشنل سیکریٹری خارجہ سید احمد معروف نے ان کا استقبال کیا، اپنے دورے کے دوران وہ وزیراعظم شہباز شریف سے بھی ملاقات کریں گے، جس میں دو طرفہ تعلقات اور علاقائی صورتحال پر تبادلہ خیال ہوگا۔
ذرائع کے مطابق اس اہم چار فریقی اجلاس کی صدارت اسحاق ڈار کریں گے، جس میں پاکستان، ترکیہ، سعودی عرب اور مصر کے وزرائے خارجہ شرکت کریں گے۔ اجلاس میں خاص طور پر ایران اور امریکا کے درمیان بڑھتی کشیدگی کو کم کرنے اور دونوں ممالک کو مذاکرات کی میز پر لانے کے امکانات پر غور کیا جائے گا۔
یہ بھی پڑھیں:ایران کا بحرین میں المونیم تنصیبات پر بڑا حملہ
ترجمان دفتر خارجہ کے مطابق یہ دورہ پاکستان اور مصر کے درمیان قریبی اور برادرانہ تعلقات کا عکاس ہے، اس سے باہمی تعاون کو مزید فروغ ملے گا، انہوں نے کہا کہ موجودہ علاقائی صورتحال کے تناظر میں یہ اجلاس انتہائی اہمیت کا حامل ہے۔
واضح رہے کہ پاکستان کی جانب سے اس سفارتی پیش رفت سے خطے میں امن کے قیام کی نئی امید پیدا ہوئی ہے، عالمی برادری کی نظریں اس اہم اجلاس پر مرکوز ہیں۔
