بحرین میں المونیم تنصیبات پر حملوں کے بعد مشرق وسطیٰ میں کشیدگی میں مزید اضافہ ہوگیا، غیر ملکی میڈیا رپورٹس کے مطابق ایرانی پاسدارانِ انقلاب نے حالیہ حملوں کی ذمہ داری قبول کرتے ہوئے دعویٰ کیا ہے کہ یہ کارروائی ایران کے اسٹیل پلانٹس پر ہونے والے حملوں کے جواب میں کی گئی۔

رپورٹس کے مطابق بحرین میں المونیم کی اہم تنصیبات کو نشانہ بنایا گیا، جس کے نتیجے میں دو افراد کے زخمی ہونے کی اطلاعات ہیں، زخمیوں کو فوری طبی امداد فراہم کی گئی۔

ایرانی پاسدارانِ انقلاب کا کہنا ہے کہ جن تنصیبات کو نشانہ بنایا گیا ان کا تعلق امریکی فوجی مفادات سے تھا، ایران پر ہونے والے حملوں کا بھرپور جواب دیا جائے گا اور کسی بھی جارحیت کو برداشت نہیں کیا جائے گا۔

ذہن نشین رہے کہ اس سے قبل پاسدارانِ انقلاب نے خبردار کیا تھا کہ خطے میں امریکی یا اسرائیلی مفادات رکھنے والے اہداف کو نشانہ بنایا جا سکتا ہے، انہوں نے یہ بھی عندیہ دیا تھا کہ ایران کی اہم تعلیمی اور صنعتی تنصیبات پر حملوں کا بدلہ لیا جائے گا۔

یہ بھی پڑھیں:ایران جنگ کیخلاف 70 لاکھ افراد سڑکوں پر نکل آئے

ماہرین کا کہنا ہے کہ اس واقعے کے بعد خطے میں حالات مزید کشیدہ ہونے کا خدشہ ہے، جبکہ عالمی برادری نے فریقین سے تحمل کا مظاہرہ کرنے اور سفارتی ذرائع سے مسائل حل کرنے پر زور دیا ہے۔