کوٹے کے مطابق پیٹرول الاٹ کرنے کیلئے ایپ جاری کرنے کا فیصلہ
فائل فوٹو
March, 25 2026
اسلام آباد: (ویب ڈیسک) وفاقی حکومت نے کوٹے کے مطابق پیٹرول الاٹ کرنے کیلئے ڈیجیٹل نظام متعارف کرانے کا فیصلہ کیا ہے۔
وفاقی حکومت پیٹرولیم مصنوعات کی راشن بندی کے لیےڈیجیٹل نظام متعارف کروا رہی ہے جس کیلئے حکومت ایک ایپ تیار کر رہی ہے جسے پیٹرولیم مصنوعات کے صارفین ڈاؤن لوڈ کر سکیں گے۔
ایپ ڈاؤن لوڈ کرنے کے بعد ہر شہری اپنی گاڑی کا نمبر اور اپنا شناختی کارڈ نمبر درج کرکے خود کو ایپ میں رجسٹرڈ کرواسکے گا۔
ذرائع کے مطابق حکومت ہر شہری کا اس کی ضرورت اور دستیابی کے مطابق پیٹرولیم کوٹہ مقرر کرے گی۔
حکام کا کہنا ہے کہ یہ فیصلہ گزشتہ ایک سال کے دوران پیٹرولیم مصنوعات کے استعمال کے جائزے کے بعد کیا گیا ہے جس میں قیمتوں میں اضافے کے باوجود کھپت میں مسلسل اضافہ دیکھا گیا۔
یہ بھی پڑھیں: عالمی منڈی میں تیل کی قیمتوں میں بڑی گراوٹ
دوسری جانب وزیر اعظم شہباز شریف آج ایوان صدر میں صدر آصف علی زرداری سے ملاقات کریں گے جہاں اس منصوبے سمیت پیٹرولیم سبسڈی کے معاملے پر بھی گفتگو ہوگی، ذرائع کے مطابق وفاقی
حکومت اب تک تقریباً 100 ارب روپے کی سبسڈی فراہم کر چکی ہے جبکہ مالی بوجھ کم کرنے کے لیے صوبوں کو بھی اس عمل میں شامل کرنے پر غور کیا جا رہا ہے۔
حکام کے مطابق وزیراعظم صدر کو ڈیجیٹل کوٹہ نظام اور سبسڈی دائرہ کار کو وسیع کرنے کے منصوبے پر اعتماد میں لیں گے تاکہ آئندہ کیلئے مربوط اور پائیدار حکمت عملی ترتیب دی جا سکے۔
