سکیورٹی ذرائع کے مطابق سکیورٹی فورسز نے پاک افغان سرحد پر افغان طالبان کی متعدد چیک پوسٹوں کو کامیابی سے نشانہ بنا کر تباہ کر دیا، سکیورٹی فورسز نے مہمند سیکٹر کے قریب افغان چیک پوسٹ مکمل طور پر تباہ کر دی۔

ذرائع کے مطابق پاک فوج کے جوانوں نے بھرپور کارروائی کرتے ہوئے افغان طالبان فوج کی گاڑی کو بھی قبضے میں لے لیا ، علاوہ ازیں افغان طالبان کے فوجی آریانہ کمپلیکس، دبگئی چیک پوسٹ، پولیس ہیڈکوارٹر اور ذاکرخیل پوسٹ کو بھی تباہ کر دیا گیا۔

سکیورٹی ذرائع نے بتایا کہ پاک فوج نے صوبہ ننگرہار میں افغان طالبان کے ٹینک کو اڑادیا، پاک فوج نے افغانستان میں ایمونیشن ڈپو اور پٹرولیم (پی او ایل) کے بڑے ذخائر تباہ کر دیے، پاکستان کی مسلح افواج نے افغان طالبان فورسز کو چیک پوسٹیں چھوڑ کر بھاگنے پر مجبور کر دیا ہے۔

یہ بھی پڑھیں: پاک فوج کا افغان جارحیت کا بھرپور جواب، دشمن کو بھاری نقصان

سکیورٹی ذرائع کا کہنا ہے کہ پاکستان کی مسلح افواج ملکی سلامتی اور بلا اشتعال جارحیت کیخلاف بھرپور جوابی کارروائی کیلئے پرعزم ہیں، پاکستانی سیکیورٹی فورسز عالمی قوانین کی پاسداری کرتے ہوئے صرف افغان فوجی اہداف کو نشانہ بنارہی ہیں، آپریشن غضب للحق تاحال جاری ہے اور اپنے اہداف حاصل ہونے تک جاری رہے گا۔

واضح رہے کہ ترجمان پاک فوج نے کچھ دیر قبل پریس بریفنگ میں تصدیق کی تھی کہ افغان طالبان رجیم کی 18 پوسٹوں پر قبضہ کیا جا چکا ہے، منہ توڑ جواب میں 274 خوارج ہلاک جبکہ 400 سے زائد زخمی ہوئے، دشمن کے 115 ٹینک اور بکتر بند گاڑیاں تباہ اور قبضہ کر لی گئی ہیں۔