ترجمان ایس این جی پی ایل نے کہا ہے کہ رمضان المبارک میں گھریلو صارفین کو صبح 3 بجے سے رات ساڑھے 10 بجے تک گیس فراہم ہو گی، کم پریشر کی صورت میں ہیلپ لائن 1199 پر رابطہ کریں۔

کمپنی ترجمان کا کہنا تھا کہ یہ شیڈول خصوصی طور پر ماہ صیام کے دوران سحر اور افطار کے اوقات میں صارفین کو زیادہ سے زیادہ سہولت فراہم کرنے کے لیے ترتیب دیا گیا ہے تاکہ روزہ داروں کو کھانا پکانے اور دیگر گھریلو ضروریات میں کسی دشواری کا سامنا نہ کرنا پڑے۔

ترجمان نے کہا کہ گیس کی فراہمی کے دوران نظام کو مستحکم رکھنے کے لیے تمام متعلقہ فیلڈ اسٹاف کو ہائی الرٹ رکھا جائے گا جبکہ مختلف علاقوں میں پریشر کی صورتحال کی مسلسل مانیٹرنگ بھی کی جائے گی۔

یہ بھی پڑھیں: وزیر توانائی کی سحر وافطار میں بجلی کی بلاتعطل فراہمی کی ہدایت

ایس این جی پی ایل حکام کے مطابق رمضان المبارک میں گیس کی طلب میں نمایاں اضافہ ہو جاتا ہے، اسی وجہ سے لوڈ مینجمنٹ پلان ترتیب دیا گیا ہے تاکہ دستیاب وسائل کو متوازن انداز میں استعمال کیا جا سکے۔

ترجمان نے صارفین سے اپیل کی ہے کہ وہ گیس کا استعمال احتیاط اور ذمہ داری کے ساتھ کریں اور غیر ضروری استعمال سے گریز کریں تاکہ سب کو مساوی سہولت میسر آ سکے۔