میڈیا رپورٹس کے مطابق آزاد کشمیر میں متوقع انتخابات سے پہلے سیاسی سرگرمیوں میں تیزی آ گئی،اسی دوران مظفرآباد ڈویژن کے حلقہ کوٹلہ سے پی ٹی آئی کے سینئر رہنما سردار تبارک علی اپنے ساتھیوں سمیت پاکستان مسلم لیگ ن میں شامل ہو گئے۔
کوٹلہ میں مسلم لیگ ن کی جانب سے شمولیتی تقریب کا انعقاد کیا گیا جس میں وفاقی وزیر برائے امور کشمیر، گلگت بلتستان و سیفران انجینئر امیر مقام نے مہمانِ خصوصی شرکت کی،انہوں نے سردار تبارک علی کو مسلم لیگ ن کا مفلر پہنا کر جماعت میں پارٹی میں شمولیت پر خوش آمدید کہا۔
تقریب میں وفاقی وزیر سردار محمد یوسف، ایم این اے ملک ابرار، مسلم لیگ (ن) آزاد کشمیر کے صدر شاہ غلام قادر، پارلیمانی لیڈر راجہ فاروق حیدر، مشتاق منہاس، طارق فاروق، بیرسٹر افتخار گیلانی، نورین عارف اور دیگر رہنما بھی شریک تھے جبکہ کارکنان کی بڑی تعداد نے بھی تقریب میں شرکت کی۔
یہ بھی پڑھیں: ایبٹ آباد یونیورسٹی، قاتلانہ حملے میں پی ٹی آئی رہنما جاں بحق
اس موقع پر وفاقی وزیر برائے مذہبی امور سردار محمد یوسف نے سردار تبارک علی کی مسلم لیگ ن میں شمولیت کو خوش آئند قرار دیتے ہوئے کہا کہ سردار تبارک علی اور ان کے ساتھیوں نے رفقاء سے مشاورت کے بعد مسلم لیگ ن میں شامل ہونے کا فیصلہ کیا۔
ان کا مزید کہنا تھا کہ مسلم لیگ ن آزاد کشمیر میں بھی بھاری اکثریت سے کامیابی حاصل کرے گی، پاکستان بنانے والی جماعت مسلم لیگ ہے اور نواز شریف کے دور میں ملک کو استحکام ملا جبکہ وزیر اعظم شہباز شریف کی قیادت میں پاکستان عالمی سطح پر نمایاں ہوا اور اسلامی دنیا کی مضبوط آواز بن چکا ہے۔
