راولپنڈی کی انسداد دہشت گردی عدالت میں اے ٹی سی کے جج امجد علی شاہ نے علیمہ خان و دیگر کے خلاف 26 نومبر احتجاج کیس کی سماعت کی۔
علیمہ خان اپنے وکیل محمد فیصل ملک کے ہمراہ عدالت کے روبرو پیش ہوئیں جبکہ اسپیشل پراسیکیوٹر ظہیر شاہ لیگل ٹیم کے ہمراہ عدالت میں موجود تھے، عدالت پیش ہونے پر ملزمہ علیمہ خان کے ناقابل ضمانت وارنٹ گرفتاری منسوخ کر دیے گئے۔
دوران سماعت علیمہ خان کے وکیل ایڈووکیٹ فیصل ملک نے نے استغاثہ کے مزید 3 گواہان پر جرح مکمل کر لی، گواہان میں سب انسپکٹر نعمان عزیز، اے ایس آئی آصف علی اور کانسٹیبل آصف شامل ہیں، وکیل صفائی اب تک مقدمے میں مجموعی طور پر 13 گواہان پر جرح مکمل کر چکے ہیں۔
یہ بھی پڑھیں: ریڈیو پاکستان حملہ، سہیل آفریدی کی شناخت بارے رپورٹ جاری
بعدازاں عدالت نے بانی پی ٹی آئی عمران خان کی ہمشیرہ علیمہ خان کا ایک بینک اکاؤنٹ ڈی فریز کرنے کا حکم دے دیا جبکہ نادرا حکام سے ملزمہ کا شناختی کارڈ ڈی فریز کرنے کے حوالے سے آئندہ سماعت پر جواب طلب کیا ہے۔
دریں اثناء علیمہ خان کے آئندہ سماعت پر پیش ہونے کی یقین دہانی کے بعد عدالت اے ٹی سی راولپنڈی نے علیمہ خان و دیگر کے خلاف 26 نومبر احتجاج کیس پر درج مقدمہ کی مزید سماعت 9 فروری بروز پیر تک ملتوی کردی۔
