نادرا رپورٹ کے مطابق ملزمان کی شناخت فیشل ریکگنیشن سسٹم (ایف آر ایس) کے ذریعے کی گئی، جس کے لیے پانچ فولڈرز پر مشتمل یو ایس بی موصول ہوئی۔
رپورٹ میں بتایا گیا کہ یو ایس بی میں وزیراعلیٰ خیبرپختونخوا سہیل آفریدی ، عامر چمکنی، عرفان سلیم، کامران اور تیمور جھگڑا کے نام کے فولڈرز تھے اور ان فولڈرز کے مذکورہ ناموں کے ساتھ پروفائل پیکچرز بھی تھیں۔
نادرا نے بتایا کہ ایف آر ایس سسٹم کے ذریعے ممکنہ طور چہرے کی شناخت قومی شناختی کارڈ نمبر کے ساتھ میچ ہوئی جبکہ گراؤنڈ کی تصدیق لازمی ہے جو یو ایس بی خط کے ساتھ بھیجی گئی تھی وہ واپس بھجوا دی گئی ہے۔
یاد رہے کہ گزشتہ برس نومبر میں وزیراعلیٰ خیبرپختونخوا سہیل آفریدی نے 9 مئی کو ریڈیو پاکستان پر حملے کی تحقیقات کے لیے انکوائری کمیشن قائم کرنے کا اعلان کرتے ہوئے کہا تھا کہ کمیشن تمام شواہد، بشمول سی سی ٹی وی فوٹیج جمع کر کے اپنی رپورٹ کابینہ کو پیش کرے گا۔
یہ بھی پڑھیں: نو مئی واقعات میں سہیل آفریدی کی موجودگی کی تصدیق
خیال رہے کہ پنجاب فرانزک سائنس ایجنسی کی رپورٹ میں بھی 9 مئی واقعات میں وزیراعلیٰ خیبرپختونخوا سہیل آفریدی ، کامران بنگش ، تیمور جھگڑا اور عرفان سلیم کی موجودگی کی تصدیق ہو گئی تھی۔
رپورٹ کے مطابق پنجاب فرانزک لیبارٹری نے پشاور پولیس کی درخواست پر 9 مئی واقعات کی ویڈیوز اور آڈیو ویژولز کا تجزیہ کیا، رپورٹ پشاور کے تھانا شرقی کی بھجوائی گئی جو یو ایس بی میں موجود ویڈیوز پر مبنی ہے، یو ایس بی میں موجود 16 ویڈیوز کا فریم بہ فریم تجزیہ کیا گیا۔
رپورٹ میں بتایا گیا کہ سہیل آفریدی کی پروفائل پکچر کو 9 مئی کی ویڈیو سے ملا کر دیکھا گیا، سہیل آفریدی کی پروفائل تصویر اور ویڈیو میں موجود شخص ایک ہی ہے، عرفان سلیم کی پروفائل تصویرکی بھی ویڈیوز میں موجود ہونے کی تصدیق ہوگئی۔
