ترجمان سوئی سدرن گیس کمپنی کا کہنا ہے کہ شب برات کے اس با برکت موقع پر سوئی سدرن گیس انتظامیہ نے سحری کے دوران گیس کی بلا تعطل فراہمی کو یقینی بنانے کے لیے 4 فروری 2026 کو صبح 3 بجے سے گیس فراہم کرنے کا فیصلہ کیا ہے۔
انہوں نے کہا کہ سحری اور افطاری کے اوقات میں گیس کی بلا تعطل فراہمی کو یقینی بنایا جائے گا، اس کے علاوہ پورا دن گیس کی فراہمی معمول کے مطابق رہے گی۔
ترجمان کا کہنا تھا کہ دیگر ایام میں گھریلو اور کمرشل صارفین کے لیے معمول کے مطابق گیس لوڈ مینجمنٹ جاری رہے گی جس کے تحت روزانہ رات 10 بجے سے صبح 5 بجے تک گیس کی فراہمی معطل رہتی ہے، یہ شیڈول سردیوں کے دوران برقرار رہے گا۔
یہ بھی پڑھیں: کراچی میں گیس لوڈشیڈنگ کا نیا شیڈول جاری
کمپنی نے گھریلو صارفین سے اپیل کی ہے کہ گیس فراہمی کے اوقات میں اگر پریشر سے متعلق کوئی مسئلہ درپیش ہو تو 24 گھنٹے فعال ہیلپ لائن 1199 پر شکایت درج کرائیں، جہاں عملے کو فوری کارروائی کی ہدایت دی گئی ہے۔
سوئی سدرن گیس نے عوام اور میڈیا سے درست معلومات شیئر کرنے کی بھی درخواست کی اور کہا کہ ماضی میں سوشل میڈیا پر غلط معلومات پھیلنے سے غیر ضروری تشویش پیدا ہوئی، درست معلومات کے ذریعے ابہام اور عوامی پریشانی میں کمی لائی جا سکتی ہے۔
