ایس ایس جی سی نے صنعتی صارفین کے لیے عارضی طور پر گیس کی فراہمی معطل کرنے کا اعلان کیا ہے۔

ترجمان سوئی سدرن گیس کمپنی نے کہا کہ موسم سرما میں طلب میں غیر معمولی اضافے کے پیش نظر گیس پریشر کو مستحکم رکھنے کے لیے گھریلو اور کمرشل صارفین کو ترجیحی بنیادوں پر گیس فراہمی یقینی بنائی جارہی ہے۔

ایس ایس جی سی ترجمان کا کہنا تھا کہ اسی پالیسی کے تحت صنعتی صارفین کے لیے گیس سپلائی ایک بار پھر معطل کرنے کا فیصلہ کیا گیا ہے، تمام صنعتی صارفین، کیپٹو پاور پلانٹس اور تمام سی این جی اسٹیشنز، چاہے وہ نیچرل گیس پر ہوں یا آر ایل این جی پر، کے لیے گیس سپلائی آئندہ 48 گھنٹے کے لیے معطل رہے گی۔

یہ بھی پڑھیں: گھر بیٹھے پیدائشی سرٹیفکیٹ کے حصول کی نئی سہولت متعارف

شیڈول کے مطابق یہ معطلی ہفتہ 17 جنوری صبح 8:00 بجے سے پیر 19 جنوری صبح 8:00 بجے تک برقرار رہے گی۔

حکام کا کہنا ہے کہ صنعتوں کیلئے گیس کی عارضی بندش کا یہ اقدام طلب اور رسد کے فرق کو کم کرنے اور شہر بھر میں گھریلو و کمرشل صارفین کو مستحکم گیس پریشر فراہم کرنے کے لیے ناگزیر ہے۔

ترجمان نے واضح کیا کہ گھریلو اور کمرشل صارفین کے لیے معمول کے مطابق گیس لوڈ مینجمنٹ جاری رہے گی جس کے تحت روزانہ رات 10 بجے سے صبح 5 بجے تک گیس کی فراہمی معطل رہتی ہے، یہ شیڈول سردیوں کے دوران برقرار رہے گا۔

کمپنی نے گھریلو صارفین سے اپیل کی ہے کہ معطلی کے دوران اگر گیس پریشر سے متعلق کوئی مسئلہ درپیش ہو تو 24 گھنٹے فعال ہیلپ لائن 1199 پر شکایت درج کرائیں، جہاں عملے کو فوری کارروائی کی ہدایت دی گئی ہے۔

اس کو بھی پڑھیں: سکولوں کے اوقات کار میں تبدیلی، نوٹیفکیشن جاری

سوئی سدرن گیس نے عوام اور میڈیا سے درست معلومات شیئر کرنے کی بھی درخواست کی اور کہا کہ ماضی میں سوشل میڈیا پر غلط معلومات پھیلنے سے غیر ضروری تشویش پیدا ہوئی۔ درست معلومات کے ذریعے ابہام اور عوامی پریشانی میں کمی لائی جا سکتی ہے۔

واضح رہے کہ کراچی میں سرد موسم کے باعث گیس کی قلت برقرار ہے، جہاں ہیٹنگ اور کھانا پکانے کے لیے گیس کی طلب میں نمایاں اضافہ دیکھنے میں آ رہا ہے۔