پاک فوج کے شعبہ تعلقات عامہ (آئی ایس پی آر) کی جانب سے بتایا گیا کہ سکیورٹی فورسز نے بلوچستان کے ضلع پنجگور میں بھارتی پراکسی فتنہ الہندوستان کے دہشت گردوں کی موجودگی کی اطلاع پر کارروائی کی جہاں بھارتی اسپانسرڈ دہشت گردوں کو نشانہ بنایا گیا۔

آئی ایس پی آر کے مطابق کارروائی کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا جس کے نتیجے میں3 بھارتی سپانسرڈ دہشتگرد ہلاک ہوئے، ہلاک ہونے والے دہشت گردوں میں مقامی کمانڈر فاروق عرف سورو جبکہ بھارتی سپانسرڈ دہشت گرد عدیل اور وسیم شامل ہیں۔

یہ بھی پڑھیں: سکیورٹی فورسز کی کارروائیوں میں 12 دہشتگرد جہنم واصل

آئی ایس پی آر کی جانب سے بتایا گیا کہ مارے جانے والے دہشت گردوں سے بڑی مقدار میں ہتھیار، ایمونیشن اور بارودی مواد برآمد ہوا ہے جبکہ علاقے کو بھارتی سپانسر دہشت گردوں سے پاک کرنے کے لیے سینیٹائزیشن آپریشنز جاری ہے، ہلاک ہونے والے دہشت گرد علاقے میں دہشت گردی کی کئی کارروائیوں میں ملوث تھے۔

ترجمان پاک فوج نے کہا کہ عزم استحکام ویژن کے تحت انسداد دہشت گردی کے لیے انتھک کارروائیاں جاری ہیں، پاکستان کی سکیورٹی فورسز اور قانون نافذ کرنے والے ادارے غیر ملکی سپانسرڈ دہشتگردی کی لعنت کے مکمل خاتمے کے لیے پوری قوت سے کارروائیاں جاری رکھیں گی۔

دہشتگردی کے خلاف جنگ جاری رہے گی: صدر مملکت

صدرِ مملکت آصف علی زرداری ، وزیراعظم محمد شہباز شریف اور وفاقی وزیر داخلہ محسن نقوی نے بلوچستان کے ضلع پنجگور میں فتنہ الہندوستان سے تعلق رکھنے والے دہشت گردوں کے خلاف کامیاب انٹیلی جنس بیسڈ آپریشن پر سکیورٹی فورسز کو خراجِ تحسین پیش کیا ہے۔

آصف علی زرداری نے کہا کہ دہشت گردی کے خلاف جنگ میں قوم کا غیر متزلزل عزم اور سکیورٹی فورسز کا کردار قابلِ ستائش ہے، فتنہ الہندوستان کے خلاف آپریشنز قومی سلامتی کے لیے ناگزیر ہیں، بیرونی مداخلت کی وجہ سے ہونے والی دہشتگردی کے خلاف جنگ جاری رہے گی۔

دہشتگردی کے مکمل خاتمے کیلئے پُرعزم ہیں: وزیراعظم

وزیراعظم محمد شہباز شریف نے کہا کہ عزم استحکام کے ویژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں،پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے، ہم ملک سے ہر قسم کی دہشت گردی کے مکمل خاتمے کے لئے پُر عزم ہیں۔

فتنہ الہندوستان کے دہشتگردوں کو چھپنے کی جگہ نہیں ملے گی: محسن نقوی

وفاقی وزیرداخلہ محسن نقوی نے پنجگور میں فتنہ الہندوستان کے دہشتگردوں کے خلاف کامیاب انٹیلی جنس بیسڈ آپریشن پر سکیورٹی فورسز کو خراج تحسین پیش کرتے ہوئے کہا کہ پاکستان کی بہادر سکیورٹی فورسز نے 3 دہشت گردوں کو عبرتناک انجام تک پہنچایا۔

محسن نقوی کا مزید کہنا تھا کہ دہشتگردوں کو جہنم واصل کرنے والے سکیورٹی فورسز کے جوانوں کو سلام پیش کرتے ہیں،بلوچستان میں امن کے قیام کے لئے سکیورٹی فورسز کے لازوال کردار کو سراہتے ہیں، فتنہ الہندوستان کے دہشتگردوں کو کہیں بھی چھپنے کی جگہ نہیں ملے گی۔