تفصیلات کے مطابق یہ اعلان وفاقی وزیر برائے سرمایہ کاری بورڈ قیصر احمد شیخ نے پائیدار سیاحت فورم اور ایکسپو سے خطاب کے دوران کیا جس کا انعقاد فیڈریشن آف پاکستان چیمبرز آف کامرس اینڈ انڈسٹری اور اسلامی چیمبر آف کامرس کے اشتراک سے کیا گیا۔

قیصر احمد شیخ نے کہا کہ نئے ڈیجیٹل نظام کے تحت غیر ملکی شہری اب پاکستان کے ویزے کے لیے آن لائن درخواست دے سکتے ہیں جس کے لیے اب کسی بھی سفارت خانے جانے کی ضرورت نہیں ہوگی، یہ عمل نہ صرف تیز اور آسان ہے بلکہ شفافیت کو بھی فروغ دیتا ہے۔

یہ بھی پڑھیں: اپنی چھت اپنا گھر پروگرام کیلئے بلاسود قرضوں کی منظوری

انہوں نے مزید کہا کہ یہ اصلاحات بین الاقوامی سیاحت کو فروغ دیں گی اور غیر ملکی سیاحوں کے لیے پاکستان کی قدرتی خوبصورتی اور ثقافتی ورثے سے لطف اندوز ہونا مزید آسان ہو جائے گا۔

آن لائن ویزا پروگرام پاکستان کے وسیع تر معاشی اور سیاحتی اصلاحاتی ایجنڈے کا حصہ ہے جس میں سرمایہ کاری کے مواقع اور کاروبار میں آسانی شامل ہیں، وزیر نے کہا کہ سیاحت روزگار کے مواقع پیدا کرنے، تجارتی سرگرمیوں کے فروغ اور مجموعی قومی پیداوار میں اضافے میں اہم کردار ادا کرتی ہے۔