پاک فوج کے شعبہ تعلقات عامہ (آئی ایس پی آر) کے مطابق چیف آف ڈیفنس فورسز و آرمی چیف فیلڈ مارشل سید عاصم منیر نے نیشنل پولیس اکیڈمی اسلام آباد کا دورہ کیا جہاں سپہ سالار کا پُرتپاک استقبال کیا گیا، پولیس کے چاق و چوبند دستے نے فیلڈ مارشل کو سلامی دی۔
آئی ایس پی آر کے مطابق فیلڈ مارشل سید عاصم منیر نے پولیس شہداء کی یادگار پر بھی حاضری دی، پھولوں کی چادر چڑھائی اور فاتحہ خوانی کی، چیف آف ڈیفنس فورسز و آرمی چیف فیلڈ مارشل سید عاصم منیر نے امن و امان کے قیام، قانون کی بالادستی اور عوام کے تحفظ کے لیے جانوں کا نذرانہ پیش کرنے والے پولیس شہداء کو خراجِ عقیدت پیش کیا۔
کیڈٹ اے ایس پیزسے گفتگو کرتے ہوئے فیلڈ مارشل سید عاصم منیر نے کہاکہ مضبوط، پیشہ ور اور عوام دوست پولیس ملک کی داخلی سلامتی اور قانون کی حکمرانی کے لیے ناگزیر ہے، پولیس شہریوں کی جان و مال اور عزت کے تحفظ میں پہلی دفاعی لائن کی حیثیت رکھتی ہے۔
یہ بھی پڑھیں: ملکی سلامتی و خودمختاری پر کوئی سمجھوتہ نہیں ہو گا، فیلڈ مارشل
چیف آف آرمی سٹاف کا کہنا تھا کہ ادارہ جاتی تعاون، جدید پولیسنگ طریقہ کاراور عوامی اعتماد کا فروغ ضروری ہے ، امن و امان کا قیام ایک مقدس ذمہ داری ہے ، مسلح افواج پاکستان کے بہادر پولیس اہلکاروں کے شانہ بشانہ کھڑی ہیں۔
اس موقع پر سینئر پولیس قیادت نے پولیسنگ کے معیار کو مزید بہتر بنانے، پیشہ وارانہ صلاحیت میں اضافے اور موجودہ سلامتی چیلنجز سے نمٹنے کے لیے ادارہ جاتی اصلاحات کے عزم کا اعادہ کیا، دورے کے دوران وفاقی وزیر داخلہ محسن نقوی اور وزیرِ مملکت برائے داخلہ طلال چودھری بھی آرمی چیف کے ہمراہ تھے۔
