ترجمان پنجاب سیف سٹی اتھارٹی نے کہا ہے کہ ای چالان سے متعلق ایس ایم ایس صرف مستند نمبر 8070 سے موصول ہوتا ہے،شہری ای چالان کی تصدیق کے لیے سیف سٹی کی ویب سائٹ echallan.psca.gop.pk یا پبلک سیفٹی ایپ کا استعمال کریں۔

انہوں نے خبردار کیا کہ سیف سٹی کبھی ایس ایم ایس کے ذریعے کیش، اکاؤنٹ یا بینک تفصیلات طلب نہیں کرتا، سیف سٹی شہریوں سے کسی بھی قسم کا کارڈ نمبر، پن کوڈ یا سکیورٹی کوڈ طلب نہیں کرتا۔

یہ بھی پڑھیں: رائیونڈ کے شہری کو انوکھا ای چالان موصول

ترجمان سیف سٹی اتھارٹی نے ہدایت کی کہ شہری مشکوک یا جعلی میسجز ملنے پر فوری طور پر پولیس کی ایمرجنسی ہیلپ لائن 15 یا ایف آئی اے سائبر کرائم ونگ سے رجوع کریں، شہری کسی بھی مشکوک پیغام یا ویب سائٹ پر ادائیگی ہرگز نہ کریں۔

سیف سٹی اتھارٹی ترجمان کا مزید کہنا تھا کہ پنجاب سیف سٹی کی تمام سروسز شہریوں کے لیے بالکل مفت ہیں،سیف سٹی ایسی تمام جعلی ویب سائٹس اور فیک نمبرز کے خلاف قانونی کارروائی میں مصروف عمل ہے۔