ذرائع کے مطابق یہ سامان بشریٰ بی بی کی بیٹی مہرالنسا کی جانب سے بھجوایا گیا، جسے فوکل پرسن رائے سلمان کھرل نے جیل کے گیٹ نمبر پانچ پر پہنچایا۔ بعد ازاں جیل حکام نے تمام سامان مقررہ قواعد و ضوابط کے تحت وصول کر لیا۔
ذرائع کا کہنا ہے کہ جیل پہنچائے گئے سامان میں روزمرہ استعمال کی متعدد اشیاء شامل تھیں تاکہ بشریٰ بی بی کو دورانِ حراست بنیادی سہولتیں میسر رہیں۔ سامان میں کپڑوں کے کئی جوڑے شامل تھے، جو موسم اور روزمرہ ضروریات کے مطابق فراہم کیے گئے۔ اس کے علاوہ پھلوں میں پپیتا، انناس اور مالٹے شامل تھے، جو غذائی ضرورت اور صحت کے پیشِ نظر بھجوائے گئے ہیں۔
یہ بھی پڑھیں: عمران خان اور بشریٰ بی بی کی ملاقات کرا دی گئی
اسی طرح خوراک کے دیگر اجزاء میں دو درجن انڈے اور دو کلو آٹا بھی شامل تھا۔ ذرائع کے مطابق جیل انتظامیہ نے تمام اشیاء کی باقاعدہ جانچ پڑتال کے بعد انہیں وصول کیا اور متعلقہ رجسٹر میں اندراج کیا گیا۔ جیل قوانین کے مطابق قیدیوں کو اہلِ خانہ کی جانب سے محدود مقدار میں اشیائے خوردونوش اور ذاتی استعمال کا سامان بھجوانے کی اجازت ہوتی ہے، تاہم ہر چیز کو سیکیورٹی چیک کے مرحلے سے گزارا جاتا ہے۔
جیل حکام کا کہنا ہے کہ بشریٰ بی بی کے لیے بھجوایا گیا سامان قواعد کے مطابق تھا، اس لیے اسے وصول کرنے میں کوئی رکاوٹ پیش نہیں آئی۔ حکام کے مطابق جیل میں قیدیوں کے حقوق اور بنیادی سہولتوں کا خیال رکھا جاتا ہے، اور قانون کے دائرے میں رہتے ہوئے اہلِ خانہ کو سامان پہنچانے کی اجازت دی جاتی ہے۔
