وزیرِ تعلیم رانا سکندر حیات نے کہا کہ پنجاب کے اسکول، کالجز اور دیگر تعلیمی ادارے سردیوں کی تعطیلات کے بعد مقررہ شیڈول کے مطابق 12 جنوری کو اپنی تعلیمی سرگرمیاں دوبارہ شروع کریں گے۔ انہوں نے کہا کہ سوشل میڈیا اور بعض غیر مصدقہ ذرائع سے یہ افواہیں پھیلائی جا رہی ہیں کہ سردیوں کی چھٹیاں میں توسیع کر دی گئی ہے، جو سراسر بے بنیاد اور گمراہ کن ہیں۔

رانا سکندر حیات نے ان خبروں کی سختی سے تردید کرتے ہوئے کہا کہ والدین، طلبہ اور اساتذہ ایسی افواہوں پر یقین نہ کریں اور صرف مستند سرکاری ذرائع سے آنے والی معلومات پر اعتماد کریں۔ انہوں نے واضح کیا کہ محکمہ تعلیم پنجاب کی جانب سے تعطیلات میں اضافے کا کوئی نوٹیفکیشن جاری نہیں کیا گیا اور نہ ہی مستقبل میں ایسا کوئی ارادہ موجود ہے۔

یہ بھی پڑھیں: راولپنڈی میں دفعہ 144 کے نفاذ میں مزید توسیع

وزیرِ تعلیم کا کہنا تھا کہ تعلیمی نظام کو بلاوجہ تعطل کا شکار کرنا طلبہ کے تعلیمی نقصان کا باعث بنتا ہے، اس لیے حکومت اس بات کو یقینی بنا رہی ہے کہ تعلیمی کیلنڈر کے مطابق کلاسز کا باقاعدہ آغاز ہو۔ انہوں نے کہا کہ سردیوں کی تعطیلات پہلے ہی موسم اور طلبہ کی صحت کو مدنظر رکھتے ہوئے دی گئی تھیں، اس کے بعد مزید چھٹیوں کی ضرورت نہیں۔

انہوں نے والدین سے بھی اپیل کی کہ وہ اپنے بچوں کو 12 جنوری سے سکول اور کالجز بھیجنے کی تیاری کریں اور کسی قسم کی غیر مصدقہ خبروں کی بنیاد پر فیصلہ نہ کریں۔ رانا سکندر حیات نے کہا کہ محکمہ تعلیم کی اولین ترجیح طلبہ کا تعلیمی مستقبل ہے اور اس حوالے سے کوئی سمجھوتہ نہیں کیا جائے گا۔

واضح رہے کہ گزشتہ چند دنوں سے سوشل میڈیا پر یہ خبریں گردش کر رہی تھیں کہ شدید سردی کے باعث پنجاب میں سردیوں کی تعطیلات میں مزید توسیع کر دی جائے گی، جس کے بعد والدین اور طلبہ میں تشویش پائی جا رہی تھی۔ وزیرِ تعلیم کے اس واضح بیان کے بعد یہ معاملہ مکمل طور پر صاف ہو گیا کہ تعلیمی ادارے 12 جنوری کو بغیر کسی تبدیلی کے دوبارہ کھلیں گے۔