بالی ووڈ کے شائقین کیلئے ایک غیر معمولی سال ثابت ہونے جارہا ہے جہاں گزشتہ برس فلم دھرندھر نے باکس آفس پر نمایاں کامیابی سمیٹی وہیں رواں سال کئی میگا بجٹ فلمیں ریلیز کے لیے تیار ہیں جو فلمی صنعت میں نئی سنسنی پیدا کرنے کی صلاحیت رکھتی ہیں۔

بھارتی میڈیا رپورٹس کے مطابق سال 2026 میں چھ ایسی بڑی فلمیں نمائش کے لیے پیش کی جائیں گی جن کا مجموعی بجٹ تقریباً 2 ہزار 80 کروڑ بھارتی روپے بتایا جا رہا ہے۔

ان فلموں میں سر فہرست رامائن ہے جسمیں رنبیر کپور بھگوان رام کے کردار میں جلوہ گر ہوں گے، فلم کی ہدایت کاری نتیش تیواری کررہے ہیں جو اس سے قبل دنگل جیسی سپر ہٹ فلم دے چکے ہیں۔

 اطلاعات کے مطابق رامائن کے پہلے حصے پر ہی 900 کروڑ روپے خرچ ہو چکے ہیں جبکہ پوری سیریز کا بجٹ چار ہزار کروڑ روپے تک بتایا جارہا ہے اور یہ فلم دیوالی کے موقع پر ریلیز کی جائے گی۔

فہرست میں دوسرے نمبر پر شاہ رخ خان کی فلم کنگ شامل ہے جسکا بجٹ تقریباً 300 کروڑ روپے ہے، اس فلم کی خاص بات یہ ہے کہ شاہ رخ خان پہلی بار اپنی بیٹی سہانا خان کے ساتھ اسکرین پر نظر آئیں گے جبکہ ہدایت کاری سدھارتھ آنند کررہے ہیں۔

یہ بھی پڑھیں: یونیورسٹی کی طالبہ نے چھت سے چھلانگ کیوں لگائی؟ وجہ سامنے آ گئی

تیسرے نمبر پر دھرندھر ٹو ہے جس میں رنوویر سنگھ مرکزی کردار ادا کریں گے، 250 کروڑ روپے کے بجٹ سے بننے والی یہ فلم 19 مارچ کو سینما گھروں میں پیش کی جائے گی۔

چوتھے نمبر پر جنگی پس منظر پر مبنی فلم بارڈر ٹو شامل ہے جس میں سنی دیول، ورون دھون اور دلجیت دوسانجھ اہم کرداروں میں دکھائی دیں گے، فلم 23 تاریخ کو ریلیز ہو گی اور اس کا بجٹ تقریبا 230 کروڑ روپے بتایا گیا ہے۔

پانچویں نمبر پر دو فلمیں شامل کی گئی ہیں، ایک سلمان خان کی بیٹل آف گلوان اور دوسری رنبیر کپور، وکی کوشل اور عالیہ بھٹ کی فلم لو اینڈ وار شامل ہیں دونوں کا بجٹ لگ بھگ 200 کروڑ روپے ہے۔

یہ تمام فلمیں نہ صرف بڑے بجٹ بلکہ معروف اداکاروں اور جدید ٹیکنالوجی کے باعث 2026 میں بالی ووڈ کو نئی بلندیوں تک لے جانے کی صلاحیت رکھتی ہیں جبکہ شائقین کے لیے سینما گھروں میں ایک بار پھر رونقیں لوٹنے کی امید ہے۔