مچھلی پکڑنے والے نوجوان کا نام عارف بتایا گیا ہے، جو پیشے کے اعتبار سے شوقیہ ماہی گیر ہے اور اکثر دریا کنارے مچھلی پکڑنے آتا رہتا ہے۔ عارف نے بتایا کہ وہ معمول کے مطابق صبح کے وقت دریائے راوی میں کانٹا ڈال کر مچھلی پکڑ رہا تھا کہ اچانک کانٹے پر غیر معمولی زور محسوس ہوا۔ کافی دیر کی جدوجہد کے بعد جب مچھلی پانی سے باہر نکالی گئی تو اس کی جسامت دیکھ کر خود عارف بھی حیران رہ گیا۔ نوجوان کا کہنا ہے کہ یہ مچھلی اچھی نسل کی ہے اور اس کی خاص بات یہ ہے کہ اس میں صرف ایک کانٹا ہوتا ہے، جو اسے دیگر اقسام سے منفرد بناتا ہے۔
یہ بھی پڑھیں: چکن کی قیمتوں میں ہوشربا اضافہ
دیوہیکل مچھلی پکڑنے کے بعد عارف اسے فروخت کرنے کے لیے شکرگڑھ کی مچھلی منڈی لے آیا، جہاں خبر پھیلتے ہی لوگوں کی بڑی تعداد منڈی پہنچ گئی۔ شہری اس مچھلی کو دیکھنے، تصاویر بنانے اور ویڈیوز ریکارڈ کرنے میں مصروف نظر آئے۔ کئی افراد کا کہنا تھا کہ انہوں نے اس سے قبل دریائے راوی سے اتنی بڑی مچھلی کبھی نہیں دیکھی۔
یہ بھی پڑھیں: سونے کی قیمتوں میں ریکارڈ اضافہ
مچھلی منڈی میں نیلامی کے دوران اب تک اس مچھلی کی قیمت 90 ہزار روپے تک لگ چکی ہے۔ عارف کا کہنا ہے کہ وہ مچھلی کو سستے داموں فروخت نہیں کرنا چاہتا اور اگر اس کی قیمت ایک لاکھ روپے تک پہنچتی ہے تو ہی وہ اسے بیچنے پر غور کرے گا۔ اس کا کہنا ہے کہ اتنی بڑی اور اچھی نسل کی مچھلی شاذ و نادر ہی پکڑی جاتی ہے، اس لیے اس کی مناسب قیمت ملنی چاہیے۔
مقامی ماہی گیروں اور بزرگ شہریوں کا کہنا ہے کہ دریائے راوی میں کبھی کبھار بڑی مچھلیاں پائی جاتی ہیں، تاہم اس طرح کی دیوہیکل مچھلی بہت کم دیکھنے میں آتی ہے۔ ان کے مطابق حالیہ برسوں میں دریاؤں کی آلودگی اور پانی کی کمی کے باعث مچھلیوں کی تعداد میں بھی واضح کمی آئی ہے، ایسے میں اس واقعے نے لوگوں کو حیران بھی کیا اور خوشی بھی دی۔
