الیکشن کمیشن کی جانب سے جاری نوٹس میں کہا گیا ہے کہ شفیع اللہ جان نے ہری پور ضمنی الیکشن کے حوالے سے الیکشن کمیشن پر الزامات لگائے گئے، شفیع اللہ جان نے الزام لگایا کہ فارم 47 اسلام آباد سے جاری ہوئے ہیں اور فارم 45 کو اپ لوڈ نہیں کیا گیا۔

نوٹس میں کہا گیا کہ الیکشن کمیشن آف پاکستان نے معاملے کا تفصیلی جائزہ لیا ہے، شفیع اللہ جان کے الزامات غلط، بے بنیاد اور گمراہ کن ہیں جن کے کوئی شواہد موجود نہیں۔

یہ بھی پڑھیں: شفیع جان نے عظمیٰ بخاری سے متعلق بیان پر معافی مانگ لی

الیکشن کمیشن نے نوٹس میں کہا کہ تصدیق شدہ شواہد کے بغیر ایسے بیانات غیر ضروری الجھاؤ پیدا کرتے ہیں، اس سے انتخابی عمل پر عوام کے اعتماد کو نقصان پہنچتا ہے، یہ بیان الیکشن کمیشن کو بدنام کرنے کی کوشش معلوم ہوتا ہے۔

الیکشن کمیشن نے نوٹس میں شفیع اللہ جان کو ہدایت کی کہ 7 روز کے اندر اپنی پوزیشن کی وضاحت کریں، ٹھوس اور تصدیق شدہ شواہد پیش کریں۔

کمیشن نے واضح کیا کہ اگر شواہد پیش نہیں کیے جاتے تو الیکشن کمیشن اس نتیجے پر پہنچے گا کہ الزامات بغیر کسی بنیادی حقائق کے تھے، ایسی صورت میں الیکشن کمیشن قانون کے مطابق کارروائی کرے گا۔

اس کو بھی پڑھیں: اس بار احتجاج کیلئے پوری تیاری ہے، شفیع جان

خیال رہے کہ اس سے قبل ہری پور ضمنی الیکشن میں کمپین کے دوران وزیراعلیٰ خیبرپختونخوا سہیل آفریدی کے دھمکی آمیز بیانات پر الیکشن کمیشن نے نوٹس لیتے ہوئے انہیں طلبی کا نوٹس جاری کیا تھا۔

ای سی پی کی جانب سے کہا گیا کہ وزیراعلیٰ سہیل آفریدی نے حویلیاں جلسے میں انتظامیہ، پولیس اور الیکشن عملے کو دھمکایا۔