وزیراعظم محمد شہباز شریف کی زیر صدارت توانائی پر کابینہ کی ذیلی کمیٹی کی سفارشات پر جائزہ اجلاس ہوا جس میں وفاقی وزراء احسن اقبال، سردار اویس احمد خان لغاری، علی پرویز ملک، احد خان چیمہ، صوبوں کے چیف سیکرٹریز اور دیگر متعلقہ سرکاری عہدے داران شریک ہوئے۔
اجلاس کے دوران شرکاء کو بریفنگ میں بتایا گیا کہ قومی انرجی پلان کے لیے تمام وزارتوں سے ابتدائی مشاورت کے لیے کام کیا جا رہا ہے۔
دوران اجلاس وزیراعظم محمد شہباز شریف نے جامع قومی انرجی پلان کی تشکیل پر متعلقہ وزارتوں اور صوبوں کی مشاورت سے کام کرنے کی اصولی منظوری دے دی، وزیر اعظم نے جامع قومی انرجی پلان کے لئے علیحدہ سیکرٹریٹ بنانے کی بھی منظوری دے دی، اجلاس میں ویلنگ چارجز کی نیلامی کے لیے فریم ورک گائیڈ لائنز کی اصولی منظوری بھی دی گئی۔
وزیراعظم محمد شہباز شریف نے ہدایت کی کہ قومی انرجی پلان کی مجوزہ پالیسی میں تمام متعلقہ وزارتیں اور صوبائی حکومتیں باہمی ہم آہنگی کے ساتھ قابل عمل جامع حکمت عملی پیش کریں، قومی انرجی پلان میں وزارت موسماتی تبدیلی، وزارت خزانہ، وزارت صنعتی پیداوار اور وزارت پٹرولیم کی سفارشات کو مؤثر انداز میں شامل کیا جائے۔
یہ بھی پڑھیں: ویزا سے متعلق پاکستانی شہریوں کے لیے خوشخبری
محمد شہباز شریف کا کہنا تھا کہ قومی انرجی پلان کی تشکیل میں صنعتوں کے لیے کم سے کم لاگت پر بجلی کی فراہمی اور گھریلو صارفین کے لیے سہولت حکومت کی اولین ترجیحات میں شامل ہے۔
وزیراعظم نے ہدایت کی کہ ملک میں بجلی کے ذیلی ترسیلی ادارے (ڈسکوز) کی نجکاری کو مؤثر انداز میں اور جلد از جلد مکمل کیا جائے، ملک کی صنعتی پیداواری صلاحیت کو بڑھانے کے لیے صنعتوں کو بجلی مسابقتی ٹیرف پر فراہم کیا جائے۔
ان کا مزید کہنا تھا کہ ملک میں بجلی کی ترسیلی نظام میں حالیہ اصلاحات کے بعد بہتری آئی ہے، تمام متعلقہ اکائیوں اور وزارتوں کی باہمی ربط سے قومی سطح پر انرجی کے گھریلو اور صنعتی صارفین کے لیے سہولت میں بہتری دیکھی گئی ہے۔
