تفصیلات کے مطابق داعش خراسان کے ترجمان اور تنظيم کے آفیشل میڈیا وِنگ الاعظائم فاؤنڈیشن کے بانی دہشت گرد خارجی سلطان عزیز اعظّام کو پاکستان کی انٹیلی جنس ایجنسی نے گرفتار کر لیا، الاعظائم فاؤنڈیشن داعش خراسان کی بھرتی اور پراپیگنڈا سرگرمیوں کی مرکزی تنظیم سمجھی جاتی ہے۔

خارجی عزیز اعظام کی گرفتاری کے بعد میڈیا سرگرمیاں بھی معطل ہو گئیں، حالیہ دنوں میں پاکستانی حکام نے داعش خراسان کے خلاف کارروائیوں کے دوران کئی ہائی پروفائل گرفتاریاں کی ہیں، تنظیم کے ترجمان سلطان عزیز اعظّام کو 16 مئی 2025 کو گرفتار کیا گیا۔

داعش ترجمان کی گرفتاری سے متعلق بات اقوامِ متحدہ کی اینالیٹیکل سپورٹ اینڈ سینکشنز مانیٹرنگ ٹیم کی سولہویں رپورٹ میں سامنے آئی ہے۔

یہ بھی پڑھیں: خیبرپختونخوا، سکیورٹی فورسز کی کارروائیاں، 13 خوارج جہنم واصل

رپورٹ کے مطابق پاکستان کی کارروائی سے داعش خراسان کے تنظیمی ڈھانچے کوعالمی سطح پر کمزور کر دیا گیا ہے، کئی منصوبہ بند حملے ناکام بنا دیے گئے جبکہ تنظیم کے جنگجوؤں کی تعداد میں کمی آئی ہے جبکہ تنظیم کے اہم کمانڈرز و نظریاتی رہنماؤں کو نیوٹرلائز کر دیا گیا ہے۔

اقوام متحدہ نے پاکستان کی داعش کیخلاف کارروائی کی تصدیق کرتے ہوئے کہا کہ پاکستان کی کارروائی سے داعش خراسان کا تنظیمی ڈھانچہ کمزور ہوا، مئی 2025 میں سلطان عزیز اعظّام اور سینئر رہنما ابو یاسر الترکی کی گرفتاری جیسے اقدامات کے نتیجے میں تنظیم کی آپریشنل طاقت میں نمایاں کمی آئی ہے۔

یو این رپورٹ میں مزید کہا گیا کہ ان کارروائیوں کے باعث "وائس آف خراسان" جیسے اہم پراپیگنڈا پلیٹ فارمز بھی معطل ہو گئے ہیں۔