ریسکیو حکام کے مطابق یہ حادثہ ایم 4 موٹروے پر مخدوم پور انٹرچینج کے قریب پیش آیا، جہاں تیز رفتار ٹریلر نے مسافر بس کو زور دار ٹکر مار دی۔ تصادم کے نتیجے میں بس میں موجود ایک خاتون ہوسٹس موقع پر ہی دم توڑ گئیں، جبکہ بس میں سوار 14 دیگر مسافر مختلف نوعیت کی چوٹوں کا شکار ہو گئے۔ حادثے کے بعد موٹروے پر کچھ دیر کیلئے ٹریفک کی روانی بھی متاثر رہی۔

یہ بھی پڑھیں:کورنگی میں 12 سالہ بچہ واٹر ٹینکر کی ٹکر سے جاں بحق

اطلاع ملتے ہی ریسکیو 1122 کی ٹیمیں فوری طور پر جائے حادثہ پر پہنچ گئیں۔ ریسکیو اہلکاروں نے پیشہ ورانہ مہارت کا مظاہرہ کرتے ہوئے بس میں پھنسے مسافروں کو نکالا اور انہیں ابتدائی طبی امداد فراہم کی۔ بعد ازاں جاں بحق ہونے والی خاتون کی لاش اور زخمی مسافروں کو سول ہسپتال کبیروالا منتقل کر دیا گیا، جہاں زخمیوں کو مزید طبی سہولیات فراہم کی جا رہی ہیں۔

ریسکیو ذرائع کے مطابق بعض زخمیوں کی حالت تشویشناک بتائی جا رہی ہے، تاہم ڈاکٹرز ان کی جان بچانے کیلئے بھرپور کوششیں کر رہے ہیں۔ حادثے کی اطلاع ملتے ہی پولیس اور موٹروے پولیس بھی موقع پر پہنچ گئی اور ٹریفک کو بحال کرنے کیلئے اقدامات کیے گئے۔ موٹروے پولیس نے حادثے کی وجوہات جاننے کیلئے تحقیقات کا آغاز کر دیا ہے۔

ریسکیو آپریشن کی نگرانی ڈیوٹی آفیسر اور اسٹیشن کوآرڈینیٹر سمیع اللہ نے کی، جنہوں نے ریسکیو ٹیموں کی کارکردگی کو سراہا۔ ابتدائی معلومات کے مطابق حادثہ تیز رفتاری یا غفلت کے باعث پیش آنے کا خدشہ ہے، تاہم حتمی رپورٹ تحقیقات مکمل ہونے کے بعد جاری کی جائے گی۔