وزیراعلیٰ پنجاب مریم نواز کی زیر صدارت امن و امان کے حوالے سے اہم اجلاس ہوا جس میں سکیورٹی سے متعلق اہم فیصلے کیے گئے، اجلاس میں بائیکس سمیت گاڑیوں پر ای ٹیگ لگانے کا فیصلہ کیاگیا، وزیراعلیٰ پنجاب مریم نواز نے صوبے میں بائیکس سمیت تمام وہیکلز پر ای ٹیگ لگانے کی منظوری دے دی ۔
اجلاس میں پنجاب سائبر کرائم انویسٹی گیشن یونٹ بنانے کی منظوری دی گئی، سائبر کرائم کا شکار خواتین اوربچیوں کیلئے خصوصی سیل قائم ہو گا، وزیراعلیٰ مریم نواز نے سائبر کرائم انویسٹی گیشن یونٹ کا سربراہ مقرر کرنے کی بھی منظوری دے دی، اضلاع میں ڈسٹرکٹ آن لائن کرائم سینٹر قائم ہوں گے۔
یہ بھی پڑھیں: بغیر ایم ٹیگ گاڑیوں کے اسلام آباد میں داخلے پر پابندی
وزیراعلیٰ مریم نواز شریف نے غیر روایتی صوبائی داخلی پوائنٹس سے آمدورفت پر پابندی یقینی بنانے کیلئے اقدامات کی ہدایت کی اور 7 روز میں مائیکرو سکیورٹی پلان بھی طلب کر لیا ، اجلاس میں صوبائی داخلی راستوں پر سرچ لائٹ لگانے اور ڈرون سرویلنس کی بھی منظوری دی گئی، وزیراعلیٰ پنجاب نے چیک پوسٹوں پر روف ٹاپ سکیورٹی مانیٹرنگ یقینی بنانے کی ہدایت کی۔
مریم نواز نے جدید ترین ڈرون ڈیفنس سسٹم خریدنے کیلئے فوری اقدامات کا حکم دیا اور ڈرون پر پابندی یقینی بنانے کے لئے اقدامات کی بھی ہدایت کی، وزیراعلیٰ نے جرائم پیشہ افراد اور دہشت گردوں کی نشاندہی کیلئے کومبنگ آپریشن مسلسل جاری رکھنے کا حکم دیا اورہجوم سے نمٹنے کے لئے قائم آر ایم پی کی ٹریننگ اور جدید ترین سکیورٹی آلات فراہم کرنے کی ہدایت کی۔
اجلاس میں یوم حضرت علیؓ پرعلماء کرام سے مشاورت کے بعد سکیورٹی ایس او پیز تشکیل دینے پر اتفاق کیا گیا جبکہ وزیراعلیٰ پنجاب نے لاہور سمیت صوبہ بھر میں صورتحال کو بروقت سنبھالنے پر صوبائی وزیر خواجہ سلمان رفیق اور لاہور پولیس کو شاباش دی، وزیراعلیٰ نے امن و امان کی بحالی کے لئے متحرک علماء کرام کو بھی خراج تحسین پیش کیا اور ان کا شکریہ ادا کیا۔
اس کو بھی پڑھیں: بغیر ایم ٹیگ گاڑیوں کیخلاف کریک ڈاؤن شروع
اس موقع پر وزیراعلیٰ مریم نواز نے کہا کہ دہشت گردی کے خاتمے کیلئے سب کو یکسو اور متحرک ہونا پڑے گا، چیک پوسٹ سے خود کش حملہ آور کاپنجاب میں داخل ہونا تشویشناک ہے، آرام سے نہیں بیٹھ سکتے سب کو ہوشیار رہنا ہوگا۔
مریم نواز کا مزید کہنا تھا کہ کہ جنگ(وار فیئر) کے طور طریقے بدل چکے ہیں، ہمیں خود کو تیار کرنا ہوگا، علماء کرام امن و امان کو برقرار رکھنے کے لئے تعاون جاری رکھیں۔
