پولیس ذرائع کے مطابق فائرنگ کا افسوسناک واقعہ پشاور کے تھانہ پشتہ خرہ کی حدود میں بورڈ بازار کے قریب پیش آیا جہاں نامعلوم موٹرسائیکل سواروں کی فائرنگ سے عالم دین اور ان کا ایک بیٹا جاں بحق ہو گیا جبکہ دوسرا شدید زخمی ہے۔
تھانہ پشتہ خرہ پولیس کی جانب سے بتایا گیا کہ عالم دین قاری عزت اللہ سفید ڈھیری میں واقع مدرسہ سے نماز جمعہ کی ادائیگی کے بعد اپنے دو بیٹوں کے ہمراہ اپنی گاڑی میں گھر جارہے تھے کہ بورڈ بازار میں نامعلوم موٹرسائیکل سواروں نے ان پر فائرنگ کر دی۔
مقامی پولیس کے مطابق فائرنگ کے نتیجے میں قاری عزت اللہ ساکن فیز 2 اور ان کا کمسن بیٹاعلی جاں بحق جبکہ دوسرا بیٹا مرتضیٰ زخمی ہوگیا۔
واقعہ کی اطلاع ملتے ہی پولیس اور ریسکیو ٹیمیں جائے وقوعہ پر پہنچ گئیں، ریسکیوں ٹیموں نے لاشوں اور زخمی بچے کو ہسپتال منتقل کردیا جہاں زخمی مرتضیٰ کا علاج معالجہ جاری ہے۔
یہ بھی پڑھیں: وزیراعظم کے کوآرڈینیٹر اختیار ولی کی والدہ انتقال کر گئیں
پولیس کی جانب سے بتایا گیا کہ موٹرسائیکل سوار افراد اندھا دھند فائرنگ کے بعد جائے وقوعہ سے فرار ہو گئے جبکہ علاقے میں خوف و ہراس پھیل گیا۔
ایس پی کینٹ احتراز خان پولیس نفری سمیت جائے وقوع پہنچے جہاں تفتیشی اداروں نے اہم شواہد اکٹھے کرلیے ہیں، قریبی علاقوں میں لگے سی سی ٹی وی کیمروں کی ریکارڈنگ حاصل کرکے نامعلوم افراد کے خلاف واقعہ کا مقدمہ درج کرلیا گیا۔
پولیس کا اس حوالے سے مزید کہنا ہے کہ واقعے کی ٹارگٹ کلنگ سمیت مختلف پہلوؤں پر تفتیش شروع کردی گئی ہے جلد ملزمان تک پہنچ جائیں گے۔
