ترجمان پولیس کے مطابق آپریشنز میں پولیس اور سیکیورٹی فورسز کی نفری محفوظ رہی، اہل علاقہ کا بھرپور تعاون بھی حاصل رہا، ہلاک دہشتگردوں سے بڑی تعداد میں اسلحہ ایمونیشن برآمد، فتنہ الخوارج کی مقامی کمانڈ پر کاری ضرب، اہم کمانڈرز ہلاک کیے گئے۔

شیری خیل، پکہ پہاڑ خیل میں فتنہ الخوارج کے جتھوں کی موجودگی پر لکی پولیس، سی ٹی ڈی بنوں اور سیکیورٹی فورسز نے آپریشن کرتے ہوئے 10 خارجی جہنم واصل جبکہ 5 زخمی اور ایک سہولت کار گرفتار کرلیا۔ ہلاک 7 دہشتگردوں کی نعشیں برآمد، 3 دشوار گزار پہاڑی علاقے میں ہونے کی وجہ سے نکالی نہ جا سکیں۔

پولیس کے مطابق ہلاک دہشتگردوں میں خطرناک فتنہ الخوارج کمانڈرز نیاز علی عرف اکاشا اور عبداللّٰہ عرف شپونکوئی شامل ہیں جو پولیس اور سیکیورٹی فورسز کو انتہائی مطلوب تھے۔ نصر خیل کے علاقے میں بھی لکی پولیس، سی ٹی ڈی اور امن کمیٹی کی مشترکہ کارروائی میں ایک مطلوب دہشتگرد ہلاک ہوگیا۔

یہ بھی پڑھیں: بھارتی ائیر فورس کا طیارہ گر کر تباہ

اہل علاقہ نے اپنے محافظوں پر اعتماد کا اظہار کرتے ہوئے فتنے کے خلاف ہتھیار اٹھا لیے۔ بنوں کے علاقے ہوید میں بھی پولیس اور امن کمیٹیوں کی دہشتگردوں سے مڈھ بیڑ، دہشتگرد دُم دبا کر بھاگنے لگے۔ ڈومیل کے علاقے میں فتنہ الخوارج کی پولیس اے پی سی پر فائرنگ، پولیس جوان مقابلے پر ڈٹ گئے۔

واقعے کی اطلاع پر بنوں پولیس، سی ٹی ڈی اور سیکورٹی فورسز کی کمک نے 8 گھنٹے طویل آپریشن میں 6 خوارج ہلاک کر دیئے جبکہ درجنوں زخمی ہوگئے۔ آپریشن میں بدنام زمانہ دہشتگرد کمانڈر رسول عرف کمانڈر اَریانہ ساتھیوں سمیت جہنم واصل ہوگیا جس کے قبضے سے اسلحہ ایمونیشن برآمد کرلیا گیا۔

آئی جی ذوالفقار حمید نے بنوں ریجن پولیس، سی ٹی ڈی اور سیکورٹی فورسز کو کامیاب آپریشنز اور دہشتگردوں پر کاری ضربات لگانے پر خصوصی شاباش دی۔ خیبرپختونخوا کی مٹی کو فتنے سے پاک کریں گے، دہشتگردوں کا انکی خفیہ پناہ گاہوں تک پیچھا کیا جائے گا۔