پاکستان ایئرپورٹ اتھارٹی (پی اے اے) نے بھارتی طیاروں کے لیے فضائی حدود کی بندش میں توسیع کا نیا نوٹم جاری کر دیا، پاکستان نے بھارتی طیاروں کے فضائی بندش میں 23 دسمبر تک توسیع کی ہے۔

نوٹم کے مطابق تمام بھارتی مسافر اور ملٹری طیاروں کے لیے پاکستان کی فضائی حدود بند رہے گی۔

یاد رہے کہ پاکستان نے بھارت کے لیے 23 اپریل 2025 سے فضائی حدود بند کر رکھی ہے، پاکستان کی فضائی حدود بندش سے بھارتی ایئرلائنز کو اربوں روپے کا نقصان ہو چکا ہے۔

ذرائع کے مطابق بھارتی سیاسی و عسکری قیادت کے کھوکھلے دعوے فضائی ناکامی سے زمین بوس ہو گئے، بھارتی ڈھکوسلے اور غرور کے برعکس پاکستان کی فضائی حدود کی بندش نے ائیر انڈیا کے چھکے چھڑا دئیے۔

آپریشن سندور میں ہونے والی تاریخی ہزیمت، بھاری مالی نقصان اور فضائی ناکامی سے بھارتی قیادت بوکھلاہٹ کا شکار ہو چکی ہے، معرکہ حق میں پاکستان کی شاندار حکمتِ عملی نے بھارت کو نہ صرف عسکری میدان بلکہ معاشی محاذ پر بھی گھٹنے ٹیکنے پر مجبور کیا۔

یہ بھی پڑھیں: بجلی سستی ہونے کا امکان، فی یونٹ کتنے کا ہو جائے گا؟

فضائی راستوں کی بندش سے 4 ہزار کروڑ سے زائد کے نقصانات کے باجود افغانستان کیساتھ فضائی راستوں سے تجارت مضحکہ خیز ہے، بھارتی عسکری قیادت کی’’ ٹریلر والی گیدڑ بھبکیاں‘‘ اس کی ناکامی کا اعتراف ہے۔

دوسری طرف ایئر انڈیا کی جانب سے حکومت سے کروڑوں روپے میں سبسڈی کا مطالبہ اصل میں بھارت کی ناکام پالیسیوں کا منہ بولتا ثبوت ہے کیونکہ بھارتی میڈیا "ریپبلک نیوز " معرکہ حق میں ہزیمت اورپاکستان کے ہاتھوں 4ہزار کروڑ روپے کے نقصانات کا اعتراف کر چکا ہے۔

بھارتی میڈیا کے مطابق ائیر انڈیا نے پاکستان کی فضائی حدود کی بندش سے 4 ہزار کروڑ روپے کا بھارتی حکومت سے مطالبہ کر دیا، ائیر انڈیا نے بھاری نقصان سے بچنے کیلئے چین کی فضائی حدود استعمال کرنے کیلئے حکومت سے رجوع کیا ہے۔

ریپبلک نیوز کے مطابق آپریشن سندور کے بعد پاکستانی فضائی حدود کی بندش نے بھارتی ائیرلائن کو طویل راستے اختیار کرنے پر مجبور کیا۔

دفاعی ماہرین کا کہنا ہے کہ بھارتی سیاسی و عسکری قیادت ہر محاذ پر پاکستان سے عبرتناک شکست کے بعد شدید بوکھلاہٹ کا شکار ہو چکی ہے۔