پی ٹی آئی رہنما اعجاز چودھری نے نو مئی تین مقدمات میں ضمانت کے اپنے وکیل میاں علی اشفاق کی وساطت سے لاہور ہائیکورٹ سے رجوع کیا۔

لاہور ہائیکورٹ کے جسٹس سید شہباز علی رضوی کی سربراہی میں دو رکنی بنچ نے پی ٹی آئی رہنما اعجاز چودھری کی نو مئی کے تین مقدمات میں ضمانت کی درخواستوں پر سماعت کی۔

درخواست گزار کی جانب سے مؤقف اپنایا گیا کہ ٹرائل کورٹ نے حقائق کا درست جائزہ نہیں لیا، بانی پی ٹی آئی عمران خان انہیں مقدمات میں ضمانتیں منظور ہو چکی ہیں۔

یہ بھی پڑھیں: نو مئی کیس، شاہ محمود بری، یاسمین راشد و دیگر کو سزائیں

دوران سماعت رہنما تحریک انصاف اعجاز چودھری کے وکیل میاں علی اشفاق نے دلائل مکمل کر لیے، وکیل صفائی کے دلائل مکمل ہونے پر عدالت نے اعجاز چودھری کی جلاؤ گھیراؤ کے 3 مقدمات میں ضمانتوں پر فیصلہ سنا دیا۔

لاہور ہائیکورٹ نے سابق سینیٹر اعجاز چودھری کی نو مئی کو جلاؤ گھیراؤ کے تین مقدمات میں ضمانتیں منظور کرنے کا حکم جاری کردیا۔

واضح رہے کہ پی ٹی آئی رہنما اعجاز چودھری کے خلاف نو مئی 2023 کو مسلم لیگ ن کا آفس جلانے ،گلبرگ میں کیٹینر نذر آتش کرنے سمیت تین مقدمات درج ہیں۔