نیشنل سائبر کرائم انویسٹی گیشن ایجنسی نے پاکستان تحریک انصاف (پی ٹی آئی) کی سوشل میڈیا ایکٹوسٹ فلک جاوید خان کو عظمیٰ بخاری فیک ویڈیو کیس میں لاہور کی ضلع کچہری میں پیش کیا۔

جوڈیشل مجسٹریٹ نعیم وٹو نے فلک جاوید جسمانی ریمانڈ کیلئے این سی سی آئی اے کی درخواست پر سماعت کی، ملزمہ کی جانب سے بیرسٹر میاں علی اشفاق عدالت پیش ہوئے۔

دوران سماعت این سی سی آئی اے حکام نے ملزمہ کے 30 روزہ جسمانی ریمانڈ کی استدعا کرتے ہوئے مؤقف اپنایا کہ فلک جاوید خان اشتہاری ہیں، ہم نے ملزمہ کی گرفتاری کے لیے 36 ریڈز کیے۔

فلک جاوید کے وکیل میاں علی اشفاق نے مخالفت کرتے ہوئے دلائل میں کہا کہ این سی سی آئی اے خود ہی شکایت کنندہ ہے اور خود ہی تفتیش کررہی ہے، عظمی بخاری کے مقدمے میں کئی سوشل میڈیا کے اکاؤنٹس کو مقدمے میں لکھا گیا۔

یہ بھی پڑھیں: پی ٹی آئی کارکن فلک جاوید کی گرفتاری کی وجہ سامنے آگئی

اس موقع پر سرکاری وکیل نے کہا کہ ملزمہ کے والد اور والدہ آئے، شامل تفتیش ہو کر چلے گئے اور ملزمہ کو پیش نہ کیا، ملزمہ کی رہائش پر ریڈ کیا تو یہ روپوش ہو گئیں۔

وکیل این سی سی آئی اے نے مزید کہا کہ ملزمہ کا موبائل درکار ہے تا کہ فارنزک کیا جا سکے۔

بعدازاں عدالت نے ملزمہ فلک جاوید کو پانچ روزہ جسمانی ریمانڈ پر این سی سی آئی اے کے حوالے کر دیا اور آئندہ سماعت پر این سی سی آئی اے سے فلک جاوید سے ہونے والی تفتیش کی رپورٹ طلب کر لی۔

واضح رہے کہ گزشتہ روز این سی سی آئی اے نے پی ٹی آئی کی سوشل میڈیا کارکن فلک جاوید کو وزیر اطلاعات پنجاب عظمیٰ بخاری کی فیک ویڈیوز کے معاملے میں گرفتار کیا تھا۔