سابق وزیراعظم عمران خان اور سابق خاتون اول بشریٰ بی بی کے خلاف توشہ خانہ ٹو کیس کی سماعت سپیشل جج سینٹرل شاہ رخ ارجمند نے اڈیالہ جیل میں کی، عمران خان اور بشریٰ بی بی کو عدالت کے روبرو پیش کیا گیا۔

سماعت کے دوران بانی پی ٹی آئی عمران خان کی تینوں بہنیں،بشریٰ بی بی کی بیٹی مہر النساء احمد بھی کمرہ عدالت موجود تھیں،سماعت کے دوران وکلاء صفائی ارشدتبریز اور ظہیر عباس چودھری بھی عدالت موجود تھے۔

سپیشل پبلک پراسیکیوٹر ایف آئی اے ذوالفقار عباس نقوی اورعمیر مجید ملک استغاثہ کی جانب سے عدالت پیش ہوئے۔

یہ بھی پڑھیں: جی ایچ کیو حملہ کیس، عمران خان کو ذاتی حیثیت میں پیش کرنے کی استدعا مسترد

دوران سماعت پراسیکیوشن کے آخری 2گواہان کا بیان ریکارڈ کر لیا گیا، عدالت میں نیب افسرمحسن ہارون اور اسسٹنٹ ڈائریکٹر ایف آئی اے شاہد پرویز کا بیان قلمبند کیا گیا، دونوں گواہان کے بیانات پر 24ستمبر کو وکلاء صفائی جرح کریں گے۔

مقدمہ میں استغاثہ کے گواہان کی شہادت مکمل ہو گئی، پراسیکیوشن کی جانب سے مزید کوئی گواہ عدالت پیش نہیں کیا جائے گا، مقدمہ میں مجموعی طور 20گواہان کی شہادت قلمبند جبکہ 18 گواہان کے بیانات پر جرح بھی مکمل کی جا چکی ہے۔

بعدازاں عدالت نے بانی پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی مزید سماعت 24 ستمبر تک ملتوی کردی۔