برطانوی ہائی کمشنر جین میریٹ نے ڈپٹی وزیراعظم و وزیر خارجہ اسحاق ڈار سے ملاقات کی، اس دوران دو طرفہ تعلقات، اعلیٰ سطح روابط کی اہمیت اور خطے کی موجودہ صورتحال پر بھی تفصیلی تبادلہ خیال کیا گیا جبکہ برطانیہ کی جانب سے سیلاب اور مون سون بارشوں سے متاثرہ علاقوں کیلئے پاکستان کے ساتھ مکمل یکجہتی کا اظہار کیا گیا۔

یہ بھی پڑھیں: شجاع آباد، دریائے چناب کا بند ٹوٹ گیا، پانی آبادیوں میں داخل

برطانوی ہائی کمشنر جین میریٹ نے برطانیہ کی جانب سے 30 لاکھ پاؤنڈ ہنگامی امداد اور مزید انسانی ہمدردی کی معاونت کا اعلان بھی کیا۔ ڈپٹی وزیراعظم اسحاق ڈار نے بروقت تعاون اور یکجہتی پر برطانوی حکومت کا شکریہ ادا کرتے ہوئے کہا کہ یہ اقدام متاثرہ عوام کیلئے بڑی سہولت ثابت ہوگا۔
سنگاپور حکومت نے بھی پاکستان کے عوام کیساتھ یکجہتی کا اظہار کرتے ہوئے 50 ہزار ڈالر امداد کا اعلان کیا ہے۔ سنگاپور کی امداد سیلاب متاثرین کی بحالی، ریسکیوکاموں میں معاونت کیلئے فراہم کی جائے گی، ایشیائی ترقیاتی بینک کے صدر نے بھی سیلاب متاثرین کیلئے 3 ملین ڈالر کی ہنگامی امداد کا اعلان کیا تھا۔