ترجمان پی ڈی ایم اے نے بتایا کہ 29 اگست سے 2 ستمبر تک پنجاب کے بیشتر اضلاع میں شدید طوفانی بارشوں کی پیشگوئی ہے، راولپنڈی، مری، گلیات، اٹک، چکوال ، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں۔

پی ڈی ایم اے کے ترجمان نے بتایا کہ ڈیرہ غازی خان، ملتان اور راجن پور میں بھی بارشوں کا امکان ہے، ڈی جی پی ڈی ایم اے عرفان علی کاٹھیا نے صوبہ بھر کے کمشنرز اور ڈپٹی کمشنرز کو الرٹ رہنے کی ہدایات کر دی ہیں۔

یہ بھی پڑھیں: بھارت کی آبی جارحیت، راوی، ستلج اور چناب بپھر گئے، پانی شہروں میں داخل

عرفان علی کاٹھیا کا کہنا تھا کہ وزیر اعلیٰ پنجاب کی ہدایت کے مطابق ضلعی انتظامیہ کو الرٹ جاری کر دیا ہے، مون سون بارشوں سے پنجاب کے دریاؤں اور ان سے ملحقہ ندی نالوں میں سیلابی صورتحال ہے، دریائے چناب راوی اور ستلج میں انتہائی اونچے درجے کا سیلاب ہے۔

ڈی جی پی ڈی ایم اے نے کہا کہ بڑے شہروں میں مون سون بارشوں کے باعث ندی نالے بپھر سکتے ہیں، تمام ڈپٹی کمشنر اور دیگر افسران فیلڈ میں موجود رہیں،محکمہ صحت، آبپاشی،تعمیر و مواصلات ،لوکل گورنمنٹ اور لایئو سٹاک کو الرٹ جاری کر دیاگیا ہے۔