ہیڈ مرالہ سے چلنے والا 9 لاکھ کیوسک کا ریلا آئندہ چند گھنٹوں میں چنیوٹ سے گزرے گا۔ ہیڈ قادر آباد کے مقام پر پانی کا بہاؤ 6 لاکھ کیوسک ریکارڈ کیا جارہا ہے جبکہ نشیبی بستیوں سے مکینوں کی محفوظ مقام پر منتقلی کا سلسلہ جاری ہے۔

دوسری جانب فیصل آباد ڈویژن میں فوج طلب کرکے 8 فلڈ ریلیف کیمپس قائم کردئیے گئے ہیں۔ انتظامیہ کی جانب سے مساجد میں اعلانات کیے جارہے ہیں۔

خانکی بیراج پر پانی کی آمد و اخراج 10 لاکھ 1 ہزار 489 کیوسک ریکارڈ کی گئی ہے۔ قادرآباد بیراج کے مقام پر پانی کی آمد و اخراج 8 لاکھ 30 ہزار کیوسک ریکارڈ کی جارہی ہے۔ اس کے علاوہ نالہ پلکھو اور نالہ ایک میں بھی شدید طغیانی کی کیفیت ہے۔ لویری والا،ٹاہلی والا،نوگراں،دولت آباد،ہری پور مکمل طور پر سیلاب کی لپیٹ میں آچکے ہیں۔

 رانا بہرام، ٹھٹھی بلوچ، فقیرانوالی میں بھی سیلابی پانی داخل ہوگیا ہے۔ انتظامیہ کی جانب سے ایمرجنسی نافذ کر دی گئی ہے۔

یہ بھی پڑھیں: ڈی جی پی ڈی ایم اے کا راوی کے اطراف کےعلاقے خالی کرنے کا حکم

بیلہ کے دیہی علاقہ جات سے شہری نقل مکانی کر رہے ہیں۔ شہرکےپوش علاقوں سےبھی شہری گھریلوسامان سمیت محفوظ مقامات پرمنتقل ہوگئے ہیں۔

واضح رہے کہ سیلاب سے سیکڑوں ایکڑز دھان اور سبزیوں کی فصلیں شدید متاثر ہیں۔ جانوروں کے چارہ جات جوار، باجرہ اور مکئی کی فصلیں تباہ ہوگئیں۔