این ڈی ایم اے کے مطابق پاکستان میں بارش برسانے والے تین موسمی سلسلے داخل ہو رہے ہیں جس کے زیر اثر 23 تا30 اگست کے دوران ملک کے بیشتر علاقوں میں شدید بارشوں کا امکان ہے۔

ایڈوائزری میں بتایا گیا ہے کہ 23 تا 25 اگست کے دوران وفاقی دارالحکومت اسلام آباد، کشمیر، خیبر پختونخوا اور پنجاب میں آندھی اور تیز ہواؤں کے ساتھ شدید بارشیں متوقع ہیں جس کے باعث شہری اور نشیبی علاقوں میں سیلابی صورتحال جبکہ پہاڑی علاقوں میں لینڈ سلائیڈنگ کا شدید خطرہ ہے۔

این ڈی ایم اے کی جانب سے کہا گیا ہے کہ پنجاب کے شمال مشرقی اضلاع بشمول راولپنڈی، اٹک، جہلم،میانوالی، خوشاب، سرگودھا،سیالکوٹ، گجرات، حافظ آباد اور منڈی بہاؤالدین میں شدید بارشیں متوقع ہیں، لاہور، فیصل آباد، ملتان، گوجرانوالہ، نارووال، تلہ گنگ اور چکوال میں سیلابی صورتحال اور نشیبی علاقے زیر آب آنے کا خدشہ ہے۔

اسی طرح ڈیرہ غازی خان، ڈیرہ اسماعیل خان اور راجن پور کے پہاڑی ندی نالوں میں پانی کا بہاؤ تیز ہونے کے باعث طغیانی کا اندیشہ ہے، خیبرپختونخوا میں 23تا27 اگست کے دوران ممکنہ بارشوں کے باعث ندی نالوں میں طغیانی جبکہ پہاڑی علاقوں میں لینڈ سلائیڈ کا خطرہ ہے۔

یہ بھی پڑھیں: پنجاب میں طوفانی بارشیں، کلاؤڈ برسٹ کا خطرہ

ایڈوائزری کے مطابق چترال، دیر، سوات، شانگلہ، مانسہرہ، بٹگرام، ایبٹ آباد، ملاکنڈ، پشاور، چارسدہ، نوشہرہ، مردان، ڈیرہ اسماعیل خان، ٹانک، بنوں اور لکی مروت میں شدید بارشیں متوقع ہیں، صوابی، مردان،مالاکنڈ اور ہزارہ ڈویژن میں شدید سیلابی صورتحال کا اندیشہ ہے جبکہ نشیبی علاقے زیر آب آ سکتے ہیں۔

این ڈی ایم اے کی جانب سے بتایا گیا کہ آزاد کشمیر میں مظفرآباد، راولا کوٹ، باغ، حویلی، کوٹلی، میرپور اور بھمبر میں ممکنہ بارش کے باعث لینڈ سلائیڈنگ اور سیلاب کا خطرہ ہے، 23 تا 27 اگست کے دوران گلگت بلتستان کے اضلاع گلگت، سکردو، ہنزہ، غذر، دیامر، استور، گانچھے اور شگر میں بھی شدید بارشیں متوقع ہیں۔

شدید بارشوں کے باعث پہاڑی علاقوں میں لینڈ سلائیڈنگ سے رابطہ سڑکیں متاثر ہونے کا خدشہ اور سیلابی صورتحال متوقع ہے۔

اسی طرح سندھ کے ساحلی اضلاع بشمول کراچی، ٹھٹہ، سجاول، بدین اور تھرپارکر میں 27 تا30 اگست کے دوران شدید بارشوں کا امکان ہے، حیدرآباد، جامشورو، نوابشاہ، دادو، خیرپور، سکھر، گھوٹکی، لاڑکانہ، جیکب آباد، شکارپور، کشمور اور شہید بینظیرآباد میں بھی بادل برسیں گے۔

اس کو بھی پڑھیں: صوابی، کلاؤڈ برسٹ، 15 افراد جاں بحق

بلوچستان کے اضلاع لسبیلہ، خضدار، آواران، قلات، گوادر، تربت، کیچ اور پنجگور میں طوفانی ہواؤں سمیت موسلادھار بارش کا امکان ہے، کوئٹہ، زیارت، ژوب، لورالائی، بارکھان، موسیٰ خیل، ڈیرہ بگٹی اور کوہلو میں 24 تا 25 اور 27 تا 30 اگست وقفے وقفے سے بارشیں متوقع ہیں۔

ایڈوائزری میں بتایا گیا کہ ڈیرہ مراد جمالی، اوستامحمد، ڈیرہ بگٹی، آواران، لسبیلہ، بارکھان، نصیر آباد، کیچ اورلہری میں سیلابی صورتحال کا اندیشہ ہے، ڈیموں میں مزید پانی کی گنجائش نہ ہونے کے باعث دریاؤں کے پانی میں اضافہ متوقع ہے۔

دریائے سندھ میں تونسہ، گڈو اور کالاباغ کے مقام پر پانی کا بہاؤ 5لاکھ کیوسک تک متوقع ہے، دریائے راوی اور چناب کے ملحقہ علاقوں میں ممکنہ شدید بارشوں کے پیش نظر پانی کے بہاؤ میں اضافے کا امکان ہے۔

این ڈی ایم اے کی جانب سے ہدایت کی گئی ہے کہ کسی بھی ایمرجنسی کی صورت میں فوری طور پر مقامی انتظامیہ اور ریسکیو حکام سے رابطہ کریں،بارشوں اور سیلاب کے دوران محتاط رہیں اور حفاظتی اقدامات یقینی بنائیں، سیاح حضرات سے التماس ہے ممکنہ بارشوں اور لینڈ سلائیڈنگ کے خطرے کے پیش نظر شمالی علاقہ جات کا سفر کرنے سے گریز کریں۔