سپیشل جج سینٹرل شاہ رخ ارجمند نے اڈیالہ جیل راولپنڈی میں کیس کی سماعت کی، بانی پی ٹی آئی عمران خان اور بشریٰ بی بی کو کمرہ عدالت میں پیش کیا گیا، وکلاء صفائی بیرسٹر سلمان صفدر اور قوسین مفتی عدالت میں پیش ہوئے۔

وکیل صفائی بیرسٹر سلمان صفدر کی جانب سے بانی پی ٹی آئی کی بہنوں اور سلمان اکرم راجہ کو کمرہ عدالت آنے کی اجازت دینے سے متعلق درخواست دی گئی، وکیل صفائی کی درخواست پر عدالت نے جیل کے باہر موجود عظمیٰ خان کو کمرہ عدالت میں بلا لیا ۔

سماعت شروع ہوئی تو وکیل صفائی قوسین مفتی نے نیب کے گواہ پر جرح کیلئے عدالت سے مزید وقت مانگا جبکہ سپیشل پراسیکیوٹر عمر مجید نے جرح کیلئے مزید وقت دیے جانے کی مخالفت کردی۔

یہ بھی پڑھیں: پی ٹی آئی کا سپریم کورٹ کے باہر احتجاج کا فیصلہ

بیرسٹر عمیر مجید نے مؤقف اپنایا کہ جان بوجھ کرٹرائل کو طول دینے کی کوشش کی جارہی ہے، بانی کی بہن کمرہ عدالت آچکی ہیں اب بھی گواہ پر جرح نہیں کی جارہی ۔

سپیشل پراسیکیوٹر نے مزید کہا کہ عدالت نے دو گواہوں کو بیان ریکارڈ کرانے کیلئے طلب کیا تھا وہ بھی کمرہ عدالت میں موجود ہیں ، بانی پی ٹی آئی عمران خان اور ان کی اہلیہ بشریٰ بی بی کے وکلاء وقت پر کمرہ عدالت بھی نہیں آتے انہیں پابند کیا جائے ۔

بعدازاں عدالت نے بانی پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی مزید سماعت 9 اگست تک ملتوی کر دی۔