ذرائع کے مطابق پی ٹی آئی کی پارلیمانی کمیٹی کا اجلاس ہوا جس میں فیصلہ کیا گیا کہ پاکستان تحریک انصاف (پی ٹی آئی) کے اراکین پارلیمنٹ سپریم کورٹ کے باہر احتجاج کریں گے۔

یہ بھی پڑھیں: تحریک انصاف کے 9 اراکین اسمبلی نااہل قرار، نوٹیفکیشن جاری

ادھر چیئرمین پاکستان تحریک انصاف (پی ٹی آئی) بیرسٹر گوہر علی پارلیمنٹ ہاوس میں میڈیا سے گفتگو کرتے ہوئے کہا کہ کل کا احتجاج کامیاب ہوا، عوام سڑکوں پر آئے اور آواز اٹھائی، آزاد کشمیر سمیت پاکستان کے 170 اضلاع، تمام تحصیلوں اور یونین کونسلز میں بھرپور احتجاج ہوا، ہم پر امن لوگ ہیں، کل بھی پر امن احتجاج ہوا، عوام نے ثابت کیا کہ وہ عمران خان کے ساتھ ہے۔

بیرسٹر گوہر علی خان کا کہنا تھا کہ پہلی مرتبہ ایسا الیکشن کمیشن ہے جو خود اسٹے پر ہے، الیکشن کمیشن کے پاس ڈائریکٹ نوٹیفکیشن کرنے کا اختیار نہیں ہے، الیکشن کمیشن نے غیر آئینی طور پر تینوں اپوزیشن لیڈران کی نااہلی کے نوٹیفکیشن جاری کئے، ہم الیکشن کمیشن کا یہ اقدام چیلنج کریں گے، ہمیں سنا ہی نہیں گیا، الیکشن کمیشن کو ہمیں سننا چاہیے تھا، تینوں اپوزیشن لیڈران کی جگہ کسی کو نامزد نہیں کریں گے۔