الیکشن کمیشن نے تحریک انصاف کے اراکین اسمبلی کی نااہلی کا نوٹیفکیشن بھی جاری کردیا، نااہل قرار دیے جانے والوں میں 5 اراکین قومی اسمبلی، 3 اراکین صوبائی اسمبلی اور ایک سینیٹر شامل ہیں۔

پی ٹی آئی رہنماؤں کو انسداد دہشتگردی عدالت فیصل آباد کے فیصلوں کی روشنی میں نااہل قرار دیا گیا ہے، عدالت کی جانب سے اپوزیشن لیڈر سینیٹ شبلی فراز، اپوزیشن لیڈر قومی اسمبلی عمر ایوب اور زرتاج گل سمیت 11 ارکان کو 10،10 سال قید کی سزا سنائی گئی تھی۔

الیکشن کمیشن کی جانب سے نوٹیفکیشن میں کہا گیا ہے کہ عدالتی فیصلے کے مطابق تمام ارکان کو قید کی سزا ہو چکی ہے، پی ٹی آئی رہنماؤں شبلی فراز اور عمر ایوب کی سینیٹ و قومی اسمبلی کی رکنیت ختم کردی گئی ہے۔

یہ بھی پڑھیں: حساس ادارے پر حملہ کیس میں پی ٹی آئی قیادت کو 10،10 سال قید

نوٹیفکیشن میں بتایا گیا ہے کہ رائے حیدر علی، حامد رضا، حسن نواز اور انصار اقبال کو بھی نااہل قرار دیا جاتا ہے، زرتاج گل، جنید افضل ساہی، مرتضیٰ اقبال اور دیگر بھی نااہل ہو گئے۔

ای سی پی یعنی الیکشن کمیشن نے عمر ایوب، شبلی فراز، زرتاج گل، صاحبزادہ حامد رضا، رائے حسن نواز سمیت دیگر اراکین پارلیمنٹ اور صوبائی اسمبلی کو ڈی سیٹ کردیا۔نوٹیفکیشن جاری۔ pic.twitter.com/XdL1Gku3kC

— Ajmal Jami (@ajmaljami) August 5, 2025

الیکشن کمیشن کے مطابق پی ٹی آئی اراکین اسمبلی کو آئین کے آرٹیکل 63 ون ایچ کے تحت نااہل اور ان کی اسمبلی کی نشستیں خالی قرار دے دی گئی ہیں، الیکشن کمیشن آف پاکستان نے تمام ارکان کو ڈی نوٹیفائی کر دیا جبکہ ان کی نشستیں اب خالی قرار دے دی گئی ہیں۔