عید کا آغاز ملک بھر میں نماز عید کے بڑے اجتماعات سے ہوا جو کہ مساجد، عید گاہوں، امام بارگاہوں اور کھلے میدانوں میں منعقد کیے گئے۔ نماز کے بعد علمائے کرام نے اپنے خطبات میں حضرت ابراہیم علیہ السلام کی قربانی کے فلسفے اور اس کی روحانی اہمیت پر روشنی ڈالی۔ انہوں نے زور دیا کہ یہ دن قربانی کے جذبے، اطاعتِ الٰہی، ایثار، اور بھائی چارے کا پیغام دیتا ہے۔
یہ بھی پڑھیں: وزیراعظم اور فیلڈ مارشل نے عمرہ کی سعادت حاصل کرلی
نماز عید کے بعد شہریوں نے سنت ابراہیمی کی پیروی کرتے ہوئے قربانی کے جانور ذبح کیے۔ بڑے شہروں سے لے کر چھوٹے قصبوں اور دیہات تک، ہر جگہ گلیوں اور محلوں میں قربانی کا عمل جاری ہے، اور لوگ جانوروں کی آلائشیں سمیٹنے کے بعد گوشت مستحقین، رشتہ داروں اور ہمسایوں میں تقسیم کر رہے ہیں۔
حکومت اور میونسپل اداروں کی جانب سے صفائی ستھرائی کے لیے خصوصی انتظامات کیے گئے ہیں تاکہ قربانی کے جانوروں کی آلائشوں کو بروقت ٹھکانے لگایا جا سکے۔ صفائی کا عمل تیز رفتاری سے جاری ہے تاکہ شہروں کا ماحول صاف ستھرا رہے اور بدبو یا بیماریوں کا خدشہ نہ ہو۔
دوسری جانب سرکاری و نجی ٹی وی چینلز نے بھی عیدالاضحیٰ کے موقع پر خصوصی نشریات ترتیب دی ہیں۔ ان پروگرامز میں حضرت ابراہیم علیہ السلام کی قربانی، عیدالاضحیٰ کی اہمیت، اور سنت ابراہیمی کی روح کو اجاگر کیا جا رہا ہے۔ عوام ان پروگرامز میں دلچسپی لے رہے ہیں اور مذہبی جذبات سے سرشار ہو کر عید کی خوشیوں میں شریک ہیں۔
یہ دن نہ صرف خوشی اور ایثار کا پیغام دیتا ہے بلکہ اسلامی اقدار اور بھائی چارے کو مضبوط بنانے کا موقع بھی فراہم کرتا ہے۔
