تفصیلات کے مطابق بھارت کی جانب سے حالیہ دنوں میں کی گئی جارحیت کے بعد خطے میں حالات کشیدہ ہو چکے ہیں۔ ایسے میں سنو نیوز نے اپنی خبروں، تجزیوں اور ویڈیوز کے ذریعے بھارتی فیک میڈیا کی جانب سے پھیلائی جانے والی جھوٹی معلومات کا پول کھولا۔ بھارت میں موجود لاکھوں افراد سنو نیوز کے یوٹیوب چینل اور فیس بک پیج پر ان خبروں کو دیکھ کر اصل حقائق سے واقف ہو رہے تھے، جو بھارتی میڈیا چھپانے کی کوشش کر رہا تھا۔

یہ بھی پڑھیں:پاکستان نے جے-10 کی مدد سے بھارت کے طیارے گرائے: امریکا

سنو نیوز کی تحقیقاتی رپورٹس اور حقائق پر مبنی مواد بھارت میں تیزی سے مقبول ہو رہا تھا، جس نے مودی حکومت کو شدید پریشانی میں مبتلا کر دیا۔ سنو نیوز کی جانب سے بھارتی جارحیت، فالس فلیگ آپریشنز، جھوٹی خبریں اور اندرونی سیاسی چالوں کو بے نقاب کیا جا رہا تھا، جس کے نتیجے میں بھارتی عوام میں سوالات جنم لے رہے تھے۔ اس دباؤ سے بچنے اور سچ کو دبانے کے لیے بھارتی حکومت نے سنو نیوز کے یوٹیوب چینل کو پہلے ہی بلاک کر دیا تھا اور اب مزید قدم اٹھاتے ہوئے فیس بک پیج کو بھی بلاک کر دیا گیا ہے۔

یہ قدم بھارتی حکومت کی آزادی صحافت کے خلاف کھلی جارحیت ہے، جو یہ ظاہر کرتا ہے کہ وہ صرف اپنی مرضی کا بیانیہ سننا اور سنوانا چاہتی ہے۔ سنو نیوز کے خلاف یہ کارروائی دراصل سچ کی آواز کو دبانے کی ایک ناکام کوشش ہے۔