سکیورٹی ذرائع کے مطابق بھارتی ڈرون آج صبح تھانہ ڈوہمن کے علاقے میں گرایا گیا، گرنے والے بھارتی ڈرون میں بارودی مواد موجود تھا۔ بھارتی ڈرون میں موجود بارودی مواد پھٹ نہ سکا۔ بھارتی ڈرون کو پاکستانی فورسزز نے انٹر سیپٹ کر کے گرایا۔

بھارتی ڈرون کے سسٹم کو جام کر کے گرا دیا گیا۔ بھارتی ڈرون کھیتوں میں گرا۔ بھارتی ڈرون کے گرنے سے کوئی جانی نقصان نہ ہوا۔

دوسری جانب آئی ایس پی آر نے کہا کہ بھارت کی جانب سے ایک بار پھر دراندازی کی کوشش کی گئی جس پر پاکستان نے فوری اور مؤثر کارروائی کرتے ہوئے بھارت کے 12 ڈرونز مار گرائے۔

پاک فوج کے ترجمان لیفٹیننٹ جنرل احمد شریف چودھری نے ایک ہنگامی پریس کانفرنس میں اس بات کی تصدیق کی کہ بھارت نے مختلف پاکستانی شہروں بشمول لاہور، گوجرانوالہ، اٹک، راولپنڈی اور کراچی میں ڈرونز بھیجے۔ ان کا کہنا تھا کہ بھارت کی یہ کارروائیاں نہ صرف پاکستان کی خودمختاری کی سنگین خلاف ورزی ہیں بلکہ خطے کے امن کے لیے شدید خطرہ بھی ہیں۔

ڈی جی آئی ایس پی آر کے مطابق، سندھ کے علاقے میانوں میں ایک ڈرون حملے کے نتیجے میں ایک شہری شہید جبکہ ایک زخمی ہوا۔ لاہور کے قریب ایک ڈرون فوجی تنصیبات کے قریب پہنچنے میں کامیاب ہوا جس کے نتیجے میں پاک فوج کے چار جوان زخمی ہوئے۔ ترجمان کے مطابق، میانوالی، بہاولپور اور چھور جیسے حساس علاقوں میں بھی ڈرونز کے ذریعے دراندازی کی کوشش کی گئی، تاہم پاکستانی فضائی اور زمینی دفاعی نظام نے بروقت ردعمل دیتے ہوئے ان کوششوں کو ناکام بنا دیا۔