سکیورٹی ماہرین کی جانب سے بھارت کے میزائل حملوں کو بلا اشتعال، غیر ذمہ دارانہ اور عالمی قوانین کی صریح خلاف ورزی قرار دیا جارہا ہے۔

ذرائع کے مطابق 6 اور 7 مئی کی درمیانی شب رات کی تاریکی میں بزدلانہ کارروائی کرتے ہوئے بھارتے نے پاکستان کے 6 مختلف مقامات کو نشانہ بنایا جس میں 26 افراد شہید جبکہ 46 زخمی ہوئے۔

ایوی ایشن ذرائع نے بتایا ہے کہ حملوں کے وقت پاکستان کی فضائی حدود میں 57 بین الاقوامی پروازیں موجود تھیں جن میں خلیجی اور یورپی ایئر لائنز بھی شامل تھیں، بھارتی حملے کے باعث بین الاقوامی شہری پروازیں خطرے میں پڑ گئیں جبکہ ہزاروں بے گناہ مسافروں کی جانیں داؤ پر لگ گئیں۔

سکیورٹی ذرائع کا کہنا ہے کہ یہ صرف پاکستان پر نہیں بلکہ عالمی امن و سلامتی پر حملہ ہے، جوہری خطے میں کشیدگی بڑھا کر بھارت نے عالمی اصولوں اور انسانی جانوں کو یکسر نظرانداز کیا،سویلین فضائی حدود کو نشانہ بنا کر بھارت نے خود کو غیر ذمہ دار ریاست کے طور پر بے نقاب کر دیا۔

ذرائع کا مزید کہنا ہے کہ عالمی برادری بھارتی جھوٹے بیانیے سے آگے دیکھے اور اصل جارح کو پہچانے، عالمی طاقتیں اب انصاف، امن اور احتساب کے لیے کھل کر سامنے آئیں کیونکہ بھارت کی جنگی مہم جوئی نے خطے اور دنیا کو بڑے خطرے میں ڈال دیا ہے۔