بانی چئیرمین پاکستان تحریک انصاف (پی ٹی آئی) عمران خان سے ملاقات کے بعد میڈیا سے بات چیت کرتے ہوئے فیصل چوہدری نے کہا کہ عمران خان کی جانب سے ہدایت جاری کی گئی ہے کہ پارٹی میں ملاقاتوں کو لیکر ڈسپلن کی کسی بھی قسم کی کارروائی نہیں ہونی چاہئے،چئیرمین پی ٹی آئی بیرسٹر گوہر کے ساتھ جو معاملہ ہوا انکو عمران خان نے پسند نہیں کیا،بانی نے کہا یہ مناسب بات نہیں۔
فیصل چودھری نے کہا کہ پارٹی کے انٹرنل معاملات پر میں بالکل بھی بات نہیں کرونگا،بشریٰ بی بی کی ملاقات نہیں ہورہی تھی وہ بھی میں نے کرادی ہے،بانی نے کہا پاکستان تحریک انصاف (پی ٹی آئی) ایک جمہوری جماعت ہے ڈسپلن ہر کسی پر لاگو ہوتا ہے۔
انہوں نے مزید کہا کہ فیملی کی ملاقات روکنے کی میں سخت مذمت کرتا ہوں،علیمہ خان کی ملاقات نہ ہونا سخت زیادتی کی بات ہے،فیملی کا قانونی حق ہے انکو ملاقات کرنے دینی چاہیئے،عمران خان کی بہنیں اپنے بھائی کو دیکھنا چاہتی ہیں سرکار کو اپنا وطیرہ بدلنا چاہیئے۔
فیصل چودھری کا کہنا تھا کہ بانی کو بتایا آپ کے پیغامات اور بیانیہ آنا بند ہوگیا ہے،بانی کا بیانیہ نہ آنا الارمنگ بات ہے،انہیں یہ بھی بتایا کہ آپ کی ٹویٹس کے ذریعے دنیا کو پیغام ملتا ہے۔
