وزیراعلیٰ خیبرپختونخوا علی امین گنڈاپور اشتہاری قرار
وزیراعلیٰ خیبرپختونخوا علی امین گنڈا پور تقریب سے خطاب کرتے ہوئے/ فائل فوٹو
January, 8 2025
اسلام آباد: (سنو نیوز) انسداد دہشتگری عدالت اسلام آباد نے عمران خان کی نااہلی پر احتجاج کے کیس میں وزیراعلیٰ خیبرپختونخوا علی امین گنڈاپور اور عمر تنویر بٹ کو اشتہاری قرار دے دیا۔
انسداد دہشتگری عدالت اسلام آباد کے جج طاہر عباس سپرا نے پاکستان تحریک انصاف (پی ٹی آئی) کے رہنماؤں کیخلاف بانی پی ٹی آئی عمران خان کی نااہلی پر احتجاج کے کیس کی سماعت کی۔
پی ٹی آئی رہنما فیصل جاوید، واثق قیوم عدالت میں پیش ہوئے۔ انسداد دہشتگردی عدالت اسلام آباد نے علی امین گنڈاپور اور عمر تنویر بٹ کو اشتہاری قرار دے دیا۔ عامر کیانی کے خلاف اشتہاری قرار دینے کا پراسس شروع کر دیا گیا۔
فیصل جاوید کی طرف سے دہشت گردی کی دفعات ختم کرنے کے لیے درخواست دائر کی گئی۔ غیر حاضر ملزمان کے وارنٹ گرفتاری جاری کر دیئے گئے۔ عدالت نے کیس کی سماعت 15 جنوری تک ملتوی کرتے ہوئے درخواستوں پر دلائل طلب کر لیے۔
یاد رہے ملزمان کیخلاف تھانہ آئی 9 میں 2022 میں مقدمہ درج کیا گیا تھا۔
