مذہبی امور کے ترجمان کے مطابق پچھلے سال کی نسبت پہلے 10دن میں 11 ہزار زیادہ درخواستیں موصول ہوئیں،نامزد بینک اگلے2دن ہفتہ اور اتوار کو حج درخواستوں کی وصولی جاری رکھیں گے،ترجمان کا کہنا ہے کہ ریگولر حج سکیم میں2 لاکھ کی ادائیگی سے حج بکنگ کروائی جا سکتی ہے۔
دوسری جانب حج درخواستوں کی وصولی کیلئے سٹیٹ بینک نے ہفتہ اور اتوار کو بھی بینک کھلے رکھنے کا فیصلہ کیا تھا، پاکستان میں عازمینِ حج کی درخواستوں کی وصولی کے لیے یہ اہم فیصلہ کیا گیا جس کے تحت نامزد بینکوں کو ہفتہ اور اتوار کو کھلا رکھنے کا حکم جاری کیا گیا،
سٹیٹ بینک آف پاکستان نے تمام متعلقہ بینکوں کو ہدایات دیں کہ وہ 3 دسمبر 2024 تک حج درخواستوں کی وصولی کے عمل کو بلا تعطل جاری رکھیں گے۔
یہ فیصلہ عازمینِ حج کے لیے سہولت فراہم کرنے اور درخواستوں کی بروقت وصولی کو یقینی بنانے کے لیے کیا گیا۔ اس فیصلے کے تحت عازمینِ حج اپنی درخواستیں ہفتہ اور اتوار دونوں دنوں میں بھی بینکوں میں جمع کروا سکیں گے۔ بینکوں کے اوقاتِ کار میں بھی تبدیلی کی گئی اور وہ دن کے 3 بجے تک کھلے رہیں گے تاکہ درخواست دہندگان کو کسی قسم کی مشکلات کا سامنا نہ ہو۔
سٹیٹ بینک نے یہ اقدام حج درخواستوں کی بڑھتی ہوئی تعداد اور عازمین کی سہولت کے پیش نظر کیا ہے تاکہ کوئی بھی شخص درخواست دینے سے محروم نہ رہ جائے۔ بینکوں کے کھلے رہنے سے عازمینِ حج کو اضافی سہولت ملے گی، خاص طور پر ان افراد کو جو ہفتہ یا اتوار کو درخواست دینے کے خواہش مند ہیں۔
واضح رہے کہ حج درخواستوں کی وصولی کی آخری تاریخ 3 دسمبر بروز منگل ہے۔
