پاکستان کا چلڈرن ایشین گیمز میں گولڈ میڈل
July, 4 2024
یاکوتسک:(سنو نیوز)روس کے شہر یاکوتسک میں جاری چلڈرن ایشین گیمز کے ریسلنگ ایونٹ میں پاکستان نے گولڈ میڈل جیت لیا۔
پاکستان کے حسن علی بھولا نے کرغزستان کے ریسلر کے خلاف دو کے مقابلے میں آٹھ پوائنٹس سے کامیابی حاصل کی۔
پاکستان کے واحد ریسلر حسن علی بھولا نے آذربائیجان، تاجکستان اور منگولیا کے ریسلرز کو شکست دے کر فائنل میں جگہ بنائی تھی۔ ان کے ساتھ کوچ غلام فرید پاکستان کی نمائندگی کر رہے ہیں۔
گولڈ میڈل جیتنے پر پاکستان ریسلنگ فیڈریشن کے صدر عبدالمبین، سینئر نائب صدر اور صدر پنجاب ریسلنگ ایسوسی ایشن ارشد ستار نے حسن علی بھولا اور کوچ غلام فرید کو مبارکباد دی۔
ارشد ستار نے کہا کہ ریسلنگ کے میدان میں ہمیشہ پاکستان کا پرچم بلند ہوا ہے اور یہ خوشی کی بات ہے کہ ہمارے نئے ریسلرز بھی سینئرز کی روایت کو آگے بڑھا رہے ہیں۔ انہوں نے حسن علی بھولا کی جیت کو ان کے مورال میں اضافے کا سبب قرار دیا۔
ارشد ستار نے وزیر کھیل فیصل ایوب کھوکھر کی جانب سے ریسلنگ کے لئے کئے جانے والے اقدامات کو سراہا اور امید ظاہر کی کہ حکومتی حوصلہ افزائی سے ریسلنگ کو مزید فروغ ملے گا۔
چلڈرن ایشین گیمز میں پاکستان چار کھیلوں اتھلیٹکس، تائیکوانڈو، جوڈو اور ریسلنگ میں شریک ہے۔
