اسٹار کرکٹر کا آخری ورلڈ کپ، اعلان کرکے مداحوں کو چونکا دیا
June, 16 2024
نیویارک:(ویب ڈیسک) امریکا اور ویسٹ انڈیز میں کھیلے جانے والے ٹی ٹونٹی ورلڈ کپ 2024 ءکے بڑھتے ہوئے جوش و خروش کے درمیان شائقین کے لیے چونکا دینے والی خبر آگئی ہے۔
نیوزی لینڈ کے اسٹار فاسٹ باؤلر ٹرینٹ بولٹ نے کہا ہے کہ یہ ان کا آخری ٹی ٹونٹی ورلڈ کپ ہوگا۔
تفصیل کے مطابق نیوزی لینڈ کے تجربہ کار فاسٹ بائولر ٹرینٹ بولٹ نے کہا کہ موجودہ T20 ورلڈ کپ اس فارمیٹ میں ان کا آخری ٹورنامنٹ ہوگا۔
خیال رہے کہ امریکا اور ویسٹ انڈیز کی میزبانی میں ہونے والا یہ آئی سی سی ٹورنامنٹ نیوزی لینڈ کے لیے ایک ڈراؤنے خواب کی طرح تھا۔ جہاں ٹیم سپر ایٹ تک پہنچنے میں بھی کامیاب نہ ہو سکی۔
کین ولیمسن کی کپتانی میں کیوی ٹیم نے بھلے ہی اپنے تیسرے میچ میں یوگنڈا کو شکست دی ہو لیکن ٹیم ٹورنامنٹ سے باہر ہو گئی۔
یوگنڈا کے خلاف نیوزی لینڈ کی فتح کے بعد ٹرینٹ بولٹ نے اپنے آخری T20 ورلڈ کپ کے بارے میں بات کی۔
بولٹ 2011 ء میں اپنے ڈیبیو کے بعد سے نیوزی لینڈ ٹیم کے اہم رکن رہے ہیں۔ انہیں T20 ورلڈ کپ، ون ڈے ورلڈ کپ اور ورلڈ ٹیسٹ چیمپئن شپ کے فائنل کھیلنے کا تجربہ ہے۔
وہ 2014 ءسے اب تک چار ٹی ٹونٹی ورلڈ کپ میں حصہ لے چکے ہیں، لیکن ایک بار بھی ورلڈ کپ جیتنے میں کامیاب نہیں ہو سکے۔
بولٹ نے نیوزی لینڈ کی یوگنڈا کے خلاف 9 وکٹوں کی فتح کے بعد پریس کانفرنس میں تصدیق کی کہ یہ ان کا آخری ٹی ٹونٹی ورلڈ کپ ہے۔
اس اسٹار پیسر نے کہا، 'اگر میں اپنے بارے میں بات کروں تو یہ میرا آخری T20 ورلڈ کپ ہوگا۔ مجھے بس اتنا ہی کہنا ہے۔'۔
یوگنڈا کے خلاف میچ سے قبل ہی نیوزی لینڈ کی ٹیم ورلڈ کپ کے سپر ایٹ راؤنڈ سے باہر ہو گئی تھی۔ ٹیم اب گروپ سی میں اپنے آخری میچ میں پاپوا نیو گنی کا مقابلہ کرے گی جو ٹی ٹونٹی ورلڈ کپ میں 34 سالہ بائیں ہاتھ کے باؤلر کا آخری میچ ہوگا۔
نیوزی لینڈ کی ٹیم کے سپر 8 سے باہر ہونے پر بولٹ نے کہا، 'ہم یقینی طور پر ٹورنامنٹ میں ایسی شروعات نہیں چاہتے تھے۔ یہ ہضم کرنا مشکل ہے۔ ہمیں مایوسی ہے کہ ہم آگے نہیں بڑھ سکے، لیکن جب بھی آپ کو ملک کی نمائندگی کا موقع ملتا ہے، یہ ایک قابل فخر لمحہ ہوتا ہے۔
نیوزی لینڈ نے اس فارمیٹ کے ورلڈ کپ میں شاندار کارکردگی کا مظاہرہ کیا ہے۔ اس سیزن سے قبل یہ ٹیم 2014 ءکے بعد سے ہر بار سیمی فائنل تک پہنچنے میں کامیاب رہی ہے۔
انہوں نے کہا، 'ملک کے لیے کھیلنے کو لے کر ڈریسنگ روم میں بڑے فخر کا ماحول ہے۔ پچھلے کئی سالوں میں ہمارا ریکارڈ بہترین رہا ہے۔ بدقسمتی سے، ہم گزشتہ ہفتے اچھا نہیں کھیل سکے اور اہلیت سے باہر ہو گئے۔
ٹرینٹ بولٹ کو بین الاقوامی کرکٹ کا کافی تجربہ ہے۔ انہوں نے ٹی ٹونٹی انٹرنیشنل فارمیٹ میں 60 میچز کھیلے ہیں جس میں انہوں نے 81 وکٹیں اپنے نام کی ہیں۔
اس کے ساتھ ہی انہوں نے 114 ون ڈے میچ کھیلتے ہوئے 211 وکٹیں حاصل کی ہیں۔
اس کے علاوہ ٹیسٹ فارمیٹ میں ان کے نام 317 وکٹیں ہیں جو انہوں نے 78 میچ کھیلتے ہوئے حاصل کیں۔
باؤلنگ کے علاوہ بیٹنگ میں بھی ان کے نام ایک نصف سنچری ہے جو ٹیسٹ فارمیٹ میں بنائی گئی۔
