وزیراعظم نے کہا کہ اگر پاکستان کو ترقی کی راہوں پر گامزن کرنا ہے تو ہر فرد کو محنت کرنی ہو گی۔ انہوں نے کہا کہ انہوں نے خود بھی ہفتے اور اتوار کی چھٹی ترک کر دی ہے۔ وزیراعظم نے حکومت سنبھالتے ہی ترقیاتی منصوبوں پر 24 گھنٹے کام کرنے کی ہدایات جاری کی تھیں۔

 

 

وزیراعظم شہباز شریف نے اسلام آباد میں اپنے گزشتہ دور حکومت میں شروع کیے گئے ٹیکنالوجی پارک کے منصوبے کا دورہ کیا اور تعمیراتی کام کی پیش رفت کا جائزہ لیا۔ اس موقع پر خطاب کرتے ہوئے وزیراعظم نے کہا کہ اسلام آباد ٹیکنالوجی پارک پاکستان کا بین الاقوامی معیار کے عین مطابق پہلا کیٹیگری 3 کا ٹیکنالوجی پارک ہو گا۔

 

 

وزیراعظم نے کہا کہ پنجاب میں بطور خادمِ اعلیٰ انہوں نے ترقیاتی منصوبوں پر 24 گھنٹے کام کرنے کا نظام متعارف کروایا تھا اور یہ بات خوش آئند ہے کہ اس منصوبے کی جلد از جلد تکمیل کے لیے اس پر بھی 24 گھنٹے کام جاری ہے۔ وزیراعظم نے پروجیکٹ ٹیم اور وزارتِ آئی ٹی کو ہدایت کی کہ وہ اس منصوبے کو جلد مکمل کرنے کے لیے اقدامات تیز کریں۔

 

 

وزیراعظم نے کہا کہ اسلام آباد ٹیکنالوجی پارک سے ملکی اور غیر ملکی اکیڈیمیا، محققین، صنعت اور منصوبہ سازوں کے مابین ہم آہنگی پیدا ہو گی۔ اس پارک سے ملکی آئی ٹی برآمدات میں سالانہ 70 ملین ڈالر کا اضافہ ہوگا اور دس ہزار روزگار کے نئے مواقع پیدا ہوں گے۔ وزیراعظم نے اس منصوبے کے لیے جنوبی کوریا کی حکومت کے تعاون کا بھی شکریہ ادا کیا۔

 

 

وزیراعظم کو اسلام آباد ٹیکنالوجی پارک کی تعمیر پر پیش رفت اور منصوبے کے حوالے سے بریفنگ دی گئی۔ بریفنگ میں بتایا گیا کہ ٹیکنالوجی پارک کا منصوبہ 14.9 ایکڑ اراضی پر تعمیر کیا جا رہا ہے اور اس میں بین الاقوامی معیار کا ڈیٹا سینٹر بھی شامل ہو گا۔

 

 

دورے کے دوران وفاقی وزیرِ اطلاعات عطاء اللہ تارڑ اور وزیرِ مملکت برائے آئی ٹی شزہ فاطمہ خواجہ بھی وزیراعظم کے ہمراہ تھے۔