غیر ملکی میڈیا کے مطابق عالمی وبا کورونا کے بعد نپاہ وائرس کے خدشات برقرار ہیں اور اسی دوران صحت کے ماہرین نے دو نئے وائرسز پر خطرے کی گھنٹی بجا دی ہے، رپورٹ کے مطابق امریکا میں صحت عامہ کے لیے انفلوئنزا ڈی وائرس اور کتوں میں پایا جانے کورونا وائرس ایک سنجیدہ چیلنج بن سکتے ہیں۔
فلوریڈا یونیورسٹی کے پروفیسر ڈاکٹر جان لیڈنکی کا کہنا ہے کہ دستیاب تحقیقی شواہد سے ظاہر ہوتا ہے کہ یہ وائرس جانوروں سے انسانوں میں منتقل ہونے کی صلاحیت رکھتے ہیں اور سانس کے امراض کا باعث بن سکتے ہیں، حیران کن طور پر یہ وائرس طویل عرصے تک ماہرین کی توجہ سے اوجھل رہے۔
یہ بھی پڑھیں: ملک کے مختلف حصوں میں بارش اور برفباری کی پیشگوئی
محققین کے مطابق ان وائرسز کی روک تھام اور بچاؤ کے لیے اب تک مؤثر حکمت عملی اختیار نہیں کی گئی جو تشویش کا باعث ہے، ماہرین نے خبردار کیا ہے کہ اگر ان میں انسان سے انسان میں منتقل ہونے کی صلاحیت پیدا ہوگئی تو یہ وبا یا عالمی وبا بن کی شکل اختیار کر سکتے ہیں۔
تحقیق میں مزید بتایا گیا کہ چونکہ زیادہ تر افراد میں ان وائرسز کے خلاف قوت مدافعت موجود نہیں اس لیے انکا پھیلاؤ صحت عامہ کے لیے سنگین نتائج کا سبب بن سکتا ہے، ماہرین نے عالمی سطح پر نگرانی اور بروقت اقدامات کی ضرورت پر زور دیا ہے۔
