بالائی اور شمالی علاقوں سمیت بعض شہروں میں بارش اور برفباری بھی متوقع ہے، جس کے باعث سردی کی شدت میں مزید اضافہ ہو سکتا ہے۔
محکمہ موسمیات کے مطابق وفاقی دارالحکومت اسلام آباد میں موسم سرد اور مطلع جزوی ابرآلود رہے گا۔ خیبرپختونخوا کے بیشتر میدانی علاقوں میں موسم سرد اور خشک رہنے کا امکان ہے، جبکہ صوبے کے بالائی اضلاع میں موسم شدید سرد رہ سکتا ہے۔ چترال، دیر، کالام، سوات اور وزیرستان میں ہلکی بارش اور پہاڑوں پر برفباری کی پیشگوئی کی گئی ہے۔
پنجاب کے بیشتر اضلاع میں موسم سرد اور خشک رہنے کی توقع ہے، تاہم مری اور گلیات میں ہلکی بارش اور برفباری ہو سکتی ہے۔ وسطی پنجاب کے علاقوں میں مطلع جزوی ابرآلود رہنے کا امکان ہے جبکہ ملتان، جھنگ، سرگودھا اور فیصل آباد میں ہلکی بوندا باندی ہو سکتی ہے، جو موسم کو مزید خوشگوار بنا دے گی۔
یہ بھی پڑھیں:وزیراعلیٰ مریم نواز کا طویل سرکاری چھٹیوں کا اعلان
علاوہ ازیں سندھ کے بیشتر علاقوں میں موسم سرد اور خشک رہنے کی پیشگوئی کی گئی ہے۔ بلوچستان میں بھی مجموعی طور پر موسم سرد اور خشک رہے گا، تاہم کوئٹہ، ژوب، زیارت، چمن، پشین اور گوادر میں ہلکی بارش اور بعض مقامات پر برفباری کا امکان ظاہر کیا گیا ہے۔
محکمہ موسمیات نے شہریوں کو مشورہ دیا ہے کہ وہ سرد موسم کے پیش نظر احتیاطی تدابیر اختیار کریں، خصوصاً بالائی علاقوں کا سفر کرنے والے افراد موسمی صورتحال سے باخبر رہیں تاکہ کسی ممکنہ دشواری سے بچا جا سکے۔
